काठमाडौं । नेकपा एमालेका अध्यक्ष केपी शर्मा ओली अस्वस्थ भएका छन्।अस्वस्थ भएपछि ओली ललितपुरको गोदवारीमा शनिबारदेखि जारी पार्टीको राष्ट्रिय महाधिवेशन प्रथम परिषद् बैठकमा गएका छैनन् ।
यसैले आज दोस्रो दिनको बैठकको अध्यक्षता एमाले वरिष्ठ उपाध्यक्ष ईश्वर पोखरेलले गरेको केन्द्रीय सदस्य विष्णु रिजालले जानकारी दिएका छन्।‘अध्यक्ष कमरेड केपी शर्मा ओली अस्वस्थताका कारण उपस्थित हुन नसकेपछि बरिष्ठ उपाध्यक्ष कमरेड ईश्वर पोखरेलको अध्यक्षतामा महाधिवेशन प्रतिनिधि परिषद्को आजको बैठक सुरु भएको छ ।’ रिजालले भने ।
स्वास्थ्यमा समस्या देखिएको भन्दै शनिबार दिउँसो ओली बैठकबाट बाहिरिएका थिए । राजनीतिक प्रतिवेदन पढिसकेपछि ओलीले बैठकको अध्यक्षता वरिष्ठ उपाध्यक्ष पोखरेलले गर्ने जानकारी दिएका थिए ।