काठमाडौं, असोज ६ । काठमाडौंको त्रिपुरेश्वरमा सोमवार ऋद्दिसिद्दि यातायातको बसभित्रै आत्मदाह गर्ने युवक मकवानपुरका अर्जुन दोङ भएको खुलेको छ । यसअघि प्रहरीले उनी दावा लामा भएको बताए पनि वास्तविक पहिचान आज खुलेको हो ।
मृतक दोङ मकवानपुरको इन्द्रसरोवर गाउँपालिका वडा नम्बर ३ का हुन् । २५ वर्षीय दोङका दुई श्रीमती र एक छोरा रहेको पनि पुष्टि भएको छ । उनको उपचारका क्रममा कीर्तिपुरस्थित बर्न अस्पतालमा राति निधन भएको प्रहरीले बताएको छ ।
अर्जुनले आत्मदाह गरेको खबरपछि परिवारका सदस्यहरु काठमाडौं आएका छन् । अर्जुनका बाबु छैनन् भने सात जना दाजुभाइमा उनी कान्छा हुन् ।
अस्पताल अगाडि सडकमा अहिले अर्जुनका लागि न्याय माग्दै प्रदर्शन भइरहेको छ । अर्जुनका परिवार, आफन्त तथा यातायात व्यवसायी प्रदर्शनमा संलग्न छ । अर्जुनले काठमाडौँमै बस चलाएर परिवार पाल्दै आएका थिए।
