काठमाडौं,असोज १६ । नेपाली कांग्रेसको १५औँ महाधिवेशनअन्तर्गत केन्द्रीय कार्यसमितिको निर्वाचनका लागि उम्मेदवारहरूको मनोनयन पत्र दर्ता असोज १९ गते हुने भएको छ।
महाधिवेशन निर्वाचन समितिले शुक्रबार जारी गरेको प्रेस विज्ञप्तिअनुसार असोज १९ गते दिउँसो २ बजेदेखि साँझ ६ बजेसम्म राष्ट्रिय सभा गृह प्रदर्शनीमार्गमा उम्मेदवारी मनोनयन पत्र दर्ता गरिनेछ।
निर्वाचन समितिले तोकिएको समयभित्र योग्य उम्मेदवारहरूले आफ्नो मनोनयन पत्र दाखिल गर्न सम्पूर्ण केन्द्रीय महाधिवेशन प्रतिनिधि सदस्यहरूलाई आग्रह गरेको छ।
कांग्रेसमा १ सभापति, २ उपसाभपति, २ महामन्त्री, ८ सहमहामन्त्री र केन्द्रीय सदस्यहरूका लागि निर्वाचन हुनेछ।
कांग्रेसमा ७५ सय हाराहारी महाधिवेशन प्रतिनिधि छन्। निर्वाचन कार्यक्रमसम्बन्धी विस्तृत विवरण भने पछि प्रकाशित गरिने निर्वाचन समितिका सदस्य सचिव राजु कटुवालले बताए।
कांग्रेसको १५औँ महाधिवेशन असोज १८ देखि २२ गतेसम्म काठमाडौंमा हुँदैछ।
