काठमाडौं । आगामी चुनावका लागि सिट भागबन्डा गर्न सत्ता गठबन्धनका शीर्ष नेताको बैठक बालुवाटारमा बसिरहेको छ । विहान नौ बजेदेखि जारी बैठकमा कार्यदलको टोली पनि छ । आजको बैठकले सिट भागबन्डाको टुंगो लगाउने बताइएको छ । छलफल चलिरहेको र शीर्ष नेताहरू निर्णयको अवस्थामा पुगेको कांग्रेस नेता एवम कार्यदलका सदस्य ज्ञानेन्द्रबहादुर कार्कीले बताए । एउटै सिटमा तीनवटा दलसम्मको दाबी रहेको र तिनै विषयमा उम्मेदवार तोक्ने गरि सहमतिको प्रयास चलिरहेको कार्कीले जानकारी दिए ।एक अर्काका दाबीलाइ अस्वाभाविक भन्दै अस्वीकार गरेपछी पाँच दलबिच कुरा मिल्न सकेको छैन । विवाद बढेर गएपछि जसपा अध्यक्ष उपेन्द्र यादवले गठबन्धन छोडेर जाने चेतावनी समेत दिएका थिए । तर आइतबार बेलुकी फेरि गठबन्धन जोगाउने र भागबन्डा पनि त्यसै अनुसार गर्ने सहमती भएको छ ।  गठबन्धनमा कांग्रेसले १०० , माओवादीले ६०,एकीकृत समाजवादीले ४०, जसपाले ३२ र राजमोले २ सिट दाबी गरेका छ्न । अब कांग्रेस,माओवादी,एकीकृत समाजवादी र जसपा आ आफ्ना दाबीबाट पछि हटेर सहमती खोज्ने प्रयास भैरहेको बताइएको छ ।