काठमाडौं । क्रिकेटर सन्दीप लामिछानेले आफूविरुद्धको षड्यन्त्रमा संलग्न सबैको नाम सार्वजनिक गर्ने चेतावनी दिएका छन् । राष्ट्रिय क्रिकेट टोलीका पूर्वकप्तान लामिछानेले आफूलाई बलात्कार मुद्दामा फसाइएको दाबी गर्दै यो ‘षड्यन्त्र’ गर्ने सबैको नाम सार्वजनिक गर्ने चेतावनी दिएका हुन् ।
बुधबार मध्यराति फेसबुकमा स्टाटस लेख्दै उनले षड्यन्त्रको भूमिका खेल्नेको नाम छिट्टै सार्वजनिक गर्ने उल्लेख गरेका छन् । ‘म कानून र सम्मानित अदालतको आदेशको सम्मान गर्दछु तर म यस षड्यन्त्रमा भूमिका खेल्ने प्रत्येक व्यक्तिको नाम छिट्टै सार्वजनिक गर्ने सबैलाई प्रतिज्ञा गर्दछु , जो यसमा संलग्न छन्।’’ उनले भनेका छन् ।
त्यसअघि बुधवार राति उनले आफुमाथि षडयन्त्र गरिएको सामाजिक सञ्जाल मार्फत बताएका थिए ।बलात्कार मुद्दामा काठमाडौँ जिल्ला अदालतबाट ८ वर्ष जेल सजाय तोकिएका सन्दीपको पुनरावेदन उच्च अदालत पाटनमा विचाराधीन छ । विश्वकप टोली घोषणा भएपछि सन्दीपले लगातार यसमा बोलिरहेका छन् । यसले उनले विश्वकप टिम घोषणा हुनु हुनुअघि नै आफ्नो मुद्दाको छिनोफानो चाहेको संकेत गर्छ ।