न्यूयोर्क । नेपालको डिजिटल प्रविधिलाई थप विकसित गर्न नेपाली महावाणिज्य दुतावास न्यूयोर्कले प्रविधि विज्ञ तथा डायस्पोराका सदस्यहरुसँग छलफल गरेको छ ।
महावाणिज्य दूतावासले जेनेस सोलुसनसँगको सहकार्यमा “टेक फर्वार्ड – युनाइटिङ डायस्पोरा ट्यालेन्ट टु पावर नेपाल्स डिजिटल लिप” शीर्षकमा भर्चुअल प्रविधि कार्यक्रम गरेको हो । महावाणिज्य दूतावास र अमेरिकाको पूर्वी तटमा रहेका नेपाली प्रविधि–नवप्रवर्तकबीच सहकार्य र बलियो सञ्जाल निर्माण गर्ने उद्देश्यले कार्यक्रम गरिएको दुतावासले जनाएको छ ।
कार्यक्रममा न्युयोर्क तथा अमेरिकाको पूर्वी तटका आठवटा राज्यमा बसोबास गर्ने नेपाली डायस्पोराका सदस्यहरू साथै विश्वका विभिन्न भागका प्रविधि–रुचि राख्ने व्यक्तिहरूको सहभागिता थियो ।
अमेरिकामा प्रविधि र नवप्रवर्तन क्षेत्रमा कार्यरत नेपाली डायस्पोरासँगको पहुँच विस्तार गर्ने उद्देश्यले दूतावासले कार्यक्रम आयोजना गरेको महावाणिज्य दुत दधिराम भण्डारीले जानकारी दिए । भण्डारीले खुला संवादको सम्भावना, सहकार्यात्मक सहभागिता प्रवद्र्धन गर्ने प्रयास तथा भविष्यमा नेपाललाई डिजिटल प्रविधिको उच्चतम विकास तर्फ अघि बढाउन दूतावास र नेपाली प्रविधि डायस्पोराबीच सहकार्यमा आधारित प्रविधि तथा नवप्रवर्तनको आधार तय गर्ने विषयमा महावाणिज्य दुतावास लागि परेको बताए ।
कार्यक्रममा महावाणिज्य दुत भण्डारीले हालै पारित गरिएको राष्ट्रिय ए आई नीति २०२५ र डिजिटल नेपाल फ्रेमवर्क २.० को मस्यौदा लगायतका सरकारी नीतिहरूको मुख्य बुँदाहरू प्रस्तुत गरेका थिए । उनले नेपाललाई उदाउँदो प्रविधि–केन्द्रको रूपमा प्रस्तुत गर्न र ब्रान्डिङ गर्न सहयोगका लागि अपिल समेत गरे ।
कार्यक्रममा क्रस रिभर बैंकमा प्रवेश रिजाल, फ्युज मेसिन्सका अनिश जोशी र ग्रो बाई डेटाका प्रसन्न ढुङ्गेल प्यानलिष्ट थिए । उनीहरुले फिनटेक, एआई, शिक्षा, स्वास्थ्यसहित अन्य क्षेत्रमा नेपाल कसरी अघि बढ्न सक्छ भन्नेबारे प्रकाश पारेका थिए । प्यानलले नेपालका सूचना प्रविधि क्षेत्रका सम्भावना र चुनौतीहरूबारे छलफल गरेको थियो । उनीहरुले नेपालमा लगानी सहजता र अनुकूल वातावरण आवश्यक रहेकोमा जोड दिए ।
