काठमाडौं, कात्तिक १२ । नेपाल प्रिमियर लिग ९एनपीएल० मा कर्णाली याक्सले विराटनगर किंग्समाथि रोमाञ्चक जित निकालेको छ । विहीवार विराटनगरले दिएको १८७ रनको लक्ष्य कर्णालीले एक बल बाँकी छँदा पूरा गर्यो । उसको जितमा कप्तान सोमपाल कामीले अलराउण्ड प्रदर्शन गरे । बलिङमा चार विकेट लिएका सोमपालले ब्याटिङमा आक्रामक अर्धशतक बनाए ।
कर्णालीका लागि कप्तान सोमपाल कामीले अर्धशतक पूरा गरे । उनी ३२ बलमा ६२ रन नटआउट रहे । उनले ४ चौका र ३ छक्का प्रहार गरे । उनले सातौं विकेटका लागि गुल्सन झासँग ६४ रनको साझेदारी गरे । गुल्सन २१ बलमा २८ रन बनाएर नटआउट रहे ।
अन्तिम ओभरमा कर्णालीलाई जितकालागि ८ रन आवश्यक थियो । पहिलो बलमा सोमपालले एक रन लिए । गुल्सनले दोस्रो बलमा दुई र तेस्रो बलमा एक रन लिए । चौथो र पाँचौ बलमा दुईदुई रन लिँदै सोमपालले कर्णालीलाई रोमाञ्चक जित दिलाए ।
त्यसअघि सोमपालले छैटौं विकेटका लागि पवन सर्राफसँग ६६ रनको साझेदारी गरेका थिए । पवन २८ बलमा ३६ रन बनाएर आउट भए । अरिफुल इस्लामले ३२ र दीपक डुम्रेले २० रनको योगदान गरे । कर्णालीले ५ विकेट सस्तैमा गुमाएपछि कर्णालीलाई सोमपाल र पवनले कर्णालीलाई सम्हालेका थिए । सोमपाल अन्तिमसम्मनै क्रिजमा टिकेर जित दिलाए ।
बलिङमा एन्जेलो म्याथुजले सर्वाधिक ३ विकेट लिए । चरिथ असलंंका, प्रतिश जिसी र कप्तान सन्दीप लामिछानेले एकएक विकेट लिए ।
त्यसअघि कीर्तिपुरस्थित टियु मैदानमा टस हारेर पहिले ब्याटिङ गरेको विराटनगरले निर्धारित २० ओभरमा ७ विकेट गुमाउँदै १८६ रन बनायो । ओपनर लोकेश बमले आक्रामक खेल्दै ८७ रनको योगदान दिए । ५२ बल खेलेका उनले ९ छक्का र ३ चौका प्रहार गरे ।
यस्तै, एन्जेलो डेभिस म्याथ्युजले २३ बलमा ३१ तथा आन्द्रे रसेलले १५ बलमा २७ रन जोडे ।
कर्णालीका कप्तान सोमपाल कामीले चार विकेट लिए भने नन्दन यादव र मार्क वाटले एक–एक विकेट हात पारे ।
