काठमाडौं, कात्तिक १३ । नेपाल पत्रकार महासंघले समाचार कक्षमा प्रवेश गरेर पत्रकारहरू पक्राउ गरेकोप्रति आपत्ति जनाएको छ ।
"प्रेस स्वतन्त्रतामाथि नांगो हस्तक्षेप गर्दै समाचार कक्षमा छिरेर नेपाल प्रहरीले पत्रकारहरू पक्राउ गरेकोमा नेपाल पत्रकार महासंघ घोर आपत्ति प्रकट गर्दछ," महासंघका महासचिव रामप्रसाद दाहालले जारी गरेको विज्ञप्तिमा भनिएको छ ।
उनले नेपाल प्रेसको कार्यालयबाट पत्रकार विश्वमणि सुवेदी, मोटिभेट न्यूजबाट शोभराज बराल र डीएनए खबरका प्रधान सम्पादक धिरज बस्नेतलाई गैरकानुनी पक्राउ गरिएको जनाएका छन् । "यस्तै नयाँ पत्रिका दैनिकका पत्रकार नवराज मैनालीलाई कार्यालयबाटै धरपकडको प्रयास भएकोमा महासंघ निन्दा र खेद व्यक्त गर्दछ," विज्ञप्तिमा भनिएको छ ।
"समाचारको विषयमा कुनै समस्या भए विधिबमोजिम समाधान खोज्न छोडेर राज्य आतंक सिर्जना गर्नु शोभनीय विषय होइन," महासंघले भनेको छ, "यो कार्य प्रेस तथा अभिव्यक्ति स्वतन्त्रतासँग सम्बन्धित अन्तर्राष्ट्रिय कानुन, संविधान र कानुनविपरीत रहेको महासंघको ठहर छ ।"
महासंघले क्षेत्राधिकार मिचेर यो स्वैच्छाचारी कमद चालिएको भन्दै खेद प्रकट गरेको छ । "महासंघ प्रेस काउन्सिल नेपालको क्षेत्राधिकारसमेत मिचेर राज्य सत्ताको आडमा प्रहरीले अपनाएको स्वेच्छाचारी कदमप्रति खेद प्रकट गर्दै कडा भर्त्सना गर्दछ । र, आमपत्रकारलाई अविचलित रूपमा प्रेस स्वतन्त्रताको अभ्यास गर्न र राज्य आतंकविरुद्ध खबरदारी गर्न आहृवान गर्दछ । र, महासंघ धरपकडका विरुद्ध सशक्त आन्दोलनमा उत्रने चेतावनी दिन चाहन्छ," वक्तव्यमा भनिएको छ ।
