काठमाडौं, कात्तिक १४ । डोल्पा जिल्ला कारागारबाट शुक्रबार राति आठ कैदी भागेका छन्। डोल्पा प्रहरीका अनुसार डोल्पाको सदरमुकाम दुनैस्थित जिल्ला कारागारबाट शुक्रबार राति सुरुङ खनेर कैदी फरार भएका हुन्।
जिल्ला प्रहरी कार्यालय डोल्पाका प्रवक्ता प्रहरी निरीक्षक विनय सिंहका अनुसार भागेका कैदी सबै पुरुष हुन्। फरार हुनेमा पाँच जना जबरजस्ती करणी मुद्दाका र तीन जना चोरी मुद्दाका कैदीबन्दी छन्। जिल्ला प्रहरी कार्यालयका प्रहरी नायब उपरीक्षक डिएसपी अनिलराज गिरीका अनुसार फरार हुने आठ जनामध्ये छ जना कैद सजाय भुक्तान गरिरहेका कैदी र दुई जना पुर्पक्षका लागि थुनामा रहेका व्यक्ति हुन्।
जबरजस्ती करणी मुद्दामा कैद भुक्तान गरिरहेका फरार हुनेहरूमा रुकुम पश्चिमको आठबिसकोट नगरपालिका-१० का राम विक, डोल्पाको त्रिपुरासुन्दरी नगरपालिका-७ का कालिप्रसाद रोकाया, त्रिपुरासुन्दरी नगरपालिका-४ का धनबहादुर बुढा भन्ने हरिबहादुर बुढा, सल्यानको कुमाख गाउँपालिका-५ का रेशम राना र जाजरकोटको बारेकोट गाउँपालिका-१ का यज्ञ विक छन्।
