काठमाडौं । नेपाली राष्ट्रिय फुटबल टिमका मुख्य प्रशिक्षक अब्दुल्लाह अल्मुताइरीले राजीनामा दिने घोषणा गरेका छन् ।
अलमुताइरीले आइतबार समाजिक सञ्जालमार्फत आफ्नो नेपाली टिमसँगको पाँच सय २५ दिनको यात्रा टुङ्गिएको घोषणा गरेका हुन । उनले यस अवधिमा सहयोग गर्ने सबैलाई धन्यवाद पनि दिएका छन । सन् २०२१ को मे २९ मा इराकविरुद्धको मैत्रीपूर्ण खेलबाट नेपाली टिम सम्हालेका अल्मुताइरीको नेतृत्वमा नेपालले अन्तिम पटक यसै वर्षको जुन १४ मा एसियाकप छनोटमा इन्डोनेसियाविरुद्ध खेलेको थियो ।
गत कात्तिकमा उनले नेपालमा थप ३ वर्षसम्म काम गर्ने गरी अखिल नेपाल फुटबल संघ एन्फासँग सम्झौता गरेका थिए । तर १० जना खेलाडीलाई प्रशिक्षण छाड्न बाध्य बनाएपछि उनी आलोचनामा परेका थिए ।