काठमाडौं । रौतहटमा मनी ट्रान्सफर सञ्चालकमाथि गोली हानेको आरोपमा प्रहरीले तीन जना भारतीय नागरिकलाई पक्राउ गरेको छ ।
शुक्रबार दिउँसो १ बजे रौतहटको परोहा नगरपालिका–९ मा शिव मनी ट्रान्सफरका सञ्चालक २६ वर्षका नितेश साहमाथि लुटेरा समूहले गोली हानेको थियो ।
घटनालगत्तै खटिएको प्रहरीले खोजतलास गर्दा तीन जना भारतीय नागरिकलाई पक्रेको हो । पक्राउ पर्नेमा भारतीय नागरिक १९ वर्षका मुनिफकुमार यादव, १८ वर्षका राजकुमार पासवान र २० वर्षका चन्द्रभान सिंह छन् ।
उनीहरुमाथि ज्यान मार्ने उद्योग, हातहतियार तथा खरखजाना र चोरीसम्बन्धी कसुरमा अनुसन्धान भइरहेको प्रहरीले जनाएको छ ।उनीहरुको साथबाट प्रहरीले मोटरसाइकल, पेस्तोल गोली लगायतका सामान बरामद गरेको छ ।
गोली प्रहारबाट घाइते भएका नितेशको बाराको परबानीपुरस्थित एलएस न्यूरो अस्पतालमा उपचारपछि काठमाडौं पठाइएको छ । आँखामा समस्या देखिएकाले थप उपचारका लागि उनलाई काठमाडौंको तिलगंगा आँखा अस्पताल ल्याएइको प्रहरीले जनाएको छ ।