काठमाडौं । पूर्व सभामुख कृष्णबहादुर महराको बयान सकिएको छ । केन्द्रीय अनुसन्धान ब्युरोका अनुसन्धान अधिकृतहरूले सरकारी वकिलको रोहबरमा दुई दिन लगाएर महरासँग बयान लिएका हुन् ।
भेपमा सुन ल्याउने गिरोहका चिनियाँ सुन तस्कर दाओजिन वाङसँग ‘कनेक्सन’ देखिएपछि सुन तस्करी जाँचबुझ आयोगले उनलाई सङ्गठित तस्करी गरेको कसुरमा मुद्दा चलाउन सिफारिस गरेको थियो ।
अनुसन्धान अधिकृतहरुसँग नेकपा (माओवादी केन्द्र) का उपाध्यक्ष समेत रहेका महराले चिनियाँ सुन तस्कर वाङसँग चिनजान रहेको स्वीकारेका छन् । उनले सोधेका सवै प्रश्नको जवाफ दिएका थिए । तर दाओजिन वाङसँग चिनजान भएपनि सुन तस्करीमा आफू संलग्न नरहेको उनले बताएका छन् ।
सुनको अवैध पैठारी(तस्करी) नियन्त्रणसम्बन्धी जाँचबुझ आयोगले प्रतिवेदन बुझाएपछि चैत ५ मा उनी पक्राउ परेका हुन् । महराका छोरा राहुल सो मुद्दामा अहिले पनि थुनामा छन् ।
चिनियाँ नागरिक वाङ सुन ल्याउने समूहका सदस्य हुन् । सुन छुटाउन चिनियाँ तस्कर दाओजिन वाङले पूर्व सभामुख कृष्णबहादुर महरा र उनको छोराको सहयोग लिएको सिआइबीको अनुसन्धानमा देखिएको थियो ।