काठमाडौं । एसीसी प्रिमियर कपको उपाधि रक्षा यात्रामा रहेको नेपालले फाइनल प्रवेशका लागि चिर प्रतिद्वन्दी युएईको सामना गर्ने भएको छ । ओमानले कुवेत विरुद्ध जित निकालेपछि युएई समूह उपविजेता बन्दै अन्तिम चारमा पुगेपछि नेपालसँग भेट पक्का भएको हो ।
जित सँगै ओमान ४ खेलमा ८ अंक सहित समूह बी को विजेता बनेको छ । युएई ६ अंक सहित दोस्रो रहँदै सेमिफाइनलमा पुगेको छ ।
गत संस्करणको फाइनलमा भिडेका यी दुई टोली यसपटक भने सेमिफाइनलमा नै भिड्न लागेका हुन् । यस्तै ओमानले भने हङकङको सामना गर्नेछ । ओमान समूह बी विजेता र हङकङ समूह ए को उपविजेता बनेका छन् ।
नेपाल र युएई बीचको पहिलो सेमिफाइनल शुक्रबार ११ः४५ बजे हुनेछ । ओमान र हङकङ बीचको खेल भने त्यही दिन ४ः१५ बजे हुनेछ ।