काठमाडौं । हाईस्कोरिङ म्याचमा दिल्ली क्यापिटल्सले गुजरात टाइटन्समाथि रोमाञ्चक र सनसनीपूर्ण जित निकालेको छ।
इन्डियन प्रिमियर लिग (आइपिएल) अन्तर्गत गएराति भएको खेलमा दिल्लीले गुजरातलाई ४ रनले हराएको हो । जितसँगै दिल्ली आठ अंकसहित तालिकाको छैटौं स्थानमा उक्लिएको छ । गुजरात टाइटन्स पनि समान आठ अंकसहित सातौं स्थानमा छ ।
२२५ रनको लक्ष्य पछ्याएको गुजरातले २० ओभरमा आठ विकेट गुमाएर २२० रन मात्रै बनाउन सक्यो । उसका लागि साइ सुदर्शनले सात चौका र दुई छक्काको सहयोगमा ६५ रन बनाए भने डेविड मिलरले २३ बलमा ५५ रनको योगदान दिए ।
बलिङतर्फ रसिक सलामले तीन विकेट लिँदा कुलदिप यादवले दुई विकेट हात पारे । पहिले ब्याटिङ गरेको दिल्लीले ४ विकेट गुमाएर २२४ रनको योगफल तयार गरेको थियो। दिल्लीले अन्तिम २ ओभरमा ५३ रन जोड्यो । अन्तिम ओभरमा उसले ३१ रन हानेको थियो ।
त्यस क्रममा कप्तान रिसभ पन्तले विस्फोटक ब्याटिङ गरे। उनले अन्तिम ओभरमै ४ छक्का र १ चौका प्रहार गरी ३१ रन बनाएका थिए।
उनी ४३ बलमा ८८ रन बनाएर नट आउट रहे। त्यस क्रममा ५ चौका र ८ छक्का प्रहार गरे। त्यस्तै ट्रिस्टन स्टुब्सले नटआउट २६ रन बनाए। ७ बल मात्रै खेलेका उनले ३ चौका र २ छक्का प्रहार गरे।त्यसअघि अक्षर पटेलले ६६ रन जोडेका थिए। ४३ बलमा उनले ५ चौका र ४ छक्का हाने।
ओपनर पृथ्वी श ११ रन बनाएर आउट हुँदा अघिल्लो खेलमा उत्कृष्ट ब्याटिङ गरेका जेक फ्रेजर मिकगर्क गुजरातविरूद्धको खेलमा १४ बल खेलेर आउट हुन पुगे। त्यसक्रममा उनले २ चौका र २ छक्का प्रहार गरी २३ रन जोडेका थिए। बलिङमा गुजरातका सन्दीप वारियरले ३ विकेट लिए।
