काठमाडौं । नेपाल इमर्जिङ टिम्स एसिया कपमा पनि छनौट हुन असफल भएको छ । शुक्रवार यूएईसँग हारेपछि एसिया कप खेल्ने बाटो बन्द भएको नेपाल अर्को दिन फेरि हङकङसँग हारेर इमर्जिङ टिम्स एसिया कपमा पनि छनौट हुन असफल भएको हो ।
योसँगै नेपालले आगामी नोभेम्बर र डिसेम्बरमा श्रीलंकामा हुने एसीसी इमर्जिङ टिम्स टी-२० एसिया कप पनि गुमाएको छ । हङकङसँगै फाइनलमा पुगेका युएई र ओमन उक्त प्रतियोगिताको लागि छनोट भएका छन् । भारत, पाकिस्तान, बंगलादेश, श्रीलंका र अफगानिस्तानको ए टोलीसँग खेल्नेछन् । खराब ब्याटिङकै कारण नेपालले दुई ठूला प्रतियोगिता खेल्ने अवसर गुमायो ।
ओमानमा जारी प्रिमियर कपमा तेस्रो स्थानका लागि भएको खेलमा नेपाल हङकङसँग चार विकेटले पराजित भयो । नेपालले दिएको १४० रनको लक्ष्य हङकङले तीन बल बाँकी छँदै पुरा गर्यो ।
हङकङका अंशुमन रथले ५० बलमा ४ चौका र २ छक्कासहित ६५ रनमा नट आउट रहे । नसरुल्लाह राना ८ बलमा ११ रनमा नट आउट रहे । बाबर हायत २६, अजिज खान १२, यासिम मुर्तजा र अदित गोरावारा ९–९ रनमा आउट भए ।
नेपालका सोमपाल कामीले ४ ओभरमा ३३ रन खर्चेर ३ विकेट लिए । दीपेन्द्रसिंह ऐरीले ४ ओभरमा २७ रन खर्चेर २ विकेट लिए ।
यसअघि टस जितेर ब्याटिङ गरेको नेपालले निर्धारित २० ओभरमा ८ विकेट गुमाएर १३९ रन बनायो । नेपालका लागि दीपेन्द्रसिंह ऐरीले सर्वाधिक ४४ रन बनाए । २९ बलको सामना गरेका ऐरीले तीन छक्का र चार चौका हाने । ऐरीले अन्तिम ओभरमा एजाज खानलाई २० रन प्रहार गरे । सन्दीप जोराले २२, कप्तान रोहित पौडेलले २१, कुशल मल्लले १३, सोमपाल कामीले १२ रन बनाए ।
नेपालले आफ्नो खराब ब्याटिङलाई निरन्तरता दिँदै निकै खराब खेल्यो । कुशल भूर्तेल र आशिफ शेख आज पनि असफल भए । कुशल आज पनि खाता नै नखोली आउट भए । कुशल मल्लले पनि खराब प्रदर्शनमा सुधार गर्न सकेनन् । ३२ रनमा तीन विकेट गुमाएको नेपालले ५० रन चौथो, ७४ रनमा पाँचौं, ८७ रनमा छैटौं र सातौ विकेट गुमाएको थियो । थप ११ रन जोड्दा नेपालले आठौं विकेट गुमायो । तर दीपेन्द्र सिंह ऐरीले नेपालका लागि फाईट गर्दै आक्रामक फिनिस गरे । । आजको खेल जित्ने टिमले इमर्जिङ टिम्स कप खेल्न पाउनेछ ।
हङकङका आयुश शुक्लाले ३ ओभरमा १७ रन खर्चेर ३ विकेट लिए । अतिक इकबाल, यासिम मुर्तजा र एहसान खानले १–१ विकेट लिए ।
