काठमाडौं । इण्डियन प्रिमियर लिग आईपीएल अन्तर्गत गएराती भएको खेलमा गुजरात टाइटन्स विजयी भएको छ ।
मोहालीमा भएको खेलमा पञ्जाव किंग्सलाई तीन विकेटले हराउँदै टाइटन्स छैटौं स्थानमा उक्लिएको छ । राहुल टेवाटियाले १८ बलमा ३६ रनको योगदान गरेपछि पञ्जावले दिएको एक सय ४३ रनको लक्ष्य गुजरातले १९ ओभर एक बलमा सात विकेट गुमाउँदै पुरा गर्यो । गुजरातका लागि शुभमन गिलले ३५ र साइ सुदर्सनले ३१ रन बनाए भने ऋद्धिमान शाहा र अज्मतुल्लाह ओमरजाईले १३–१३ रन बनाए ।
बलिङतर्फ पञ्जावका हर्सल पटेलले तीन विकेट र लियाम लिभिङस्टोनले दुई विकेट हात पारे ।टस जितेर ब्याटिङ रोजेको पञ्जाबले २० ओभरमा सबै विकेट गुमाउँदै एक सय ४२ रन बनाएको थियो । यसका लागि प्रभासिमरन सिंहले ३५ रन बनाए भने हरप्रित भ्रारले २९ रन जोडे ।
पञ्जाबलाई सस्तैमा आउट गर्न साई किशोरलेचार विकेट लिए भने मोहित शर्मा र नुर अहमदले दुई दुई विकेट लिए । जितसँगै गुजरातले आठ खेलमा आठ अंक जोडेको छ समान खेलबाट चार अंक जोडेको पञ्जाब पुछारबाट दोस्रो स्थानमा छ ।