काठमाडौं,कात्तिक ३ । नेपाल प्रिमियर लिग (एनपीएल) को तेस्रो संस्करणका सम्पूर्ण खेलमा डिसिजन रिभ्यु सिस्टम (डीआरएस) प्रविधि लागू हुने भएको छ ।
डिआरएस लागू हुने भएपछि खेल समय परिवर्तन गरिएको छ । क्यानका सचिव पारस खड्काले विज्ञप्ति निकालेर यो जानकारी दिएका हुन् ।
संशोधित तालिकाअनुसार दैनिक दुई खेल हुने दिन पहिलो खेल दिउँसो १२:३० बजे सुरु हुनेछ भने दोस्रो खेल बेलुकी ५ बजे सुरु हुनेछ ।
यस्तै, दैनिक एक खेल मात्रै हुने दिन उक्त खेल बेलुकी ५ बजेदेखि सुरु हुने क्यानले जनाएको छ।
यसअघि पनि पहिलो खेल १२ः३० बजेबाट रहेको थियो भने दोस्रो खेल ४ः३० बजे राखिएको थियो। दैनिक एक मात्र खेल हुने समय पनि ४ः३० बजे थियो ।
एनपीएल कात्तिक ९ देखि सुरू हुँदै छ । उद्घाटन खेलमा साविक विजेता लुम्बिनी लायन्स र उपविजेता सुदूरपश्चिम रोयल्स भिड्नेछन् ।
