काठमाडौं, कात्तिक २६ । साविक विजेता लुम्बिनी लायन्स तेस्रो संस्करणको नेपाल प्रिमियर लिग एनपीएलको प्ले अफमा पुगेको छ ।
बिहीबार भएको लो स्कोरिङ खेलमा कर्णाली याक्सलाई ४ विकेटले हराउँदै लुम्बिनीले एक खेल बाँकी छँदै प्लेअफमा स्थान बनाएको हो । लुम्बिनी प्लेअफ पुग्ने पहिलो टिम हाे ।
कर्णालीले दिएको १०६ रनको सामान्य लक्ष्य लुम्बिनीले २० बल अघिनै ६ विकेट गुमाएर पूरा गर्याे । ६ खेलबाट लुम्बिनी ९ अंक जोडेर शीर्ष स्थानमा उक्लेको छ । लुम्बिनीले अब लिग चरणको आफ्नो अन्तिम खेल विराटनगर किंग्ससँग खेल्नेछ ।
लगातार चौथो हारपछि कर्णालीको प्लेअफ सम्भावना कमजोर बनेको छ । शुरुका दुई खेल जितेको कर्णाली त्यसपछिका लगातार चार खेलमा पराजित भयाे । कर्णाली ६ खेलबाट ४ अंकसहित सातौं स्थानमा छ ।
लुम्बिनीकाे जितमा डार्शी सर्टले सर्वाधिक ४६ रन बनाए ।उनले ३४ बल खेल्दै ६ चौका र १ छक्का प्रहार गरे । दिलिप नाथले नट आउट २८ रन बनाए ।
निरोशन डिकवेलाले १३ बलमा २ चौका हानेर १६ रन जोडे । शमिम हुसेन ५ रन जोडेर आउट भए । बलिङमा कर्णालीका लागि मार्क वाटले शानदार प्रदर्शन गरे । उनले ४ ओभरमा १ ओभर मेडन राख्दै १२ रन मात्र खर्चेर ४ विकेट लिए । पवन सर्राफ र हुसेन तलतले १-१ विकेट लिए ।
त्यसअघि कीर्तिपुरस्थित टीयू मैदानमा टस जितेर पहिले ब्याटिङ गरेको कर्णालीले १९.२ ओभरमा सबै विकेट गुमाएर १०५ रन बनाएकाे थियाे ।
कर्णालीका लागि सोमपाल कामीले १८ बल खेल्दै ४ चौका र १ छक्का मद्दतमा सर्वाधिक २८ रन बनाए । हुसेन तलातले २४, गुलशनकुमार झाले १३ र पवन सर्राफले १२ रन बनाए । बाँकी ब्याटरले दोहोरो अङ्कमा रन जोड्न सकेनन् ।
बलिङतर्फ लुम्बिनी लायन्सका लागि कप्तान रोहितकुमार पौडेल, डार्सी सर्ट, किशोर महतो र अभिषेश गौतमले दुई दुई तथा शेर मल्लले एक विकेट लिए ।
