काठमाडौं । अमेरिकाको न्यूजर्सीमा 'नेपाल डे' कार्यक्रम गरिने भएको छ । न्यूजर्सीमा रहेका विभिन्न संघसंस्थाको आयोजनामा यही शनिबार न्यूजर्सीको फेरलन सिटीमा कार्यक्रम गर्न लागिएको हो ।
नेपाल सरकारका पर्यटन प्रवद्र्धक गोकुल श्रेष्ठले बक्तव्य निकालेर 'नेपाल डे' मा सहभागि भई कार्यक्रम सफल पार्न डायस्पोराका सम्पूर्ण नेपालीलाई आह्वान गरेका छन् ।
'हाम्रो पहिचान, कला, संस्कृति र सभ्यताको आफ्नै इतिहास र विरासत सगरमाथाजस्तै उँचो छ । यो गौरवशाली इतिहास र विरासतको सम्र्बद्धन नेपालमा मात्र नभई नेपालीहरु रहेका हरेक ठाँउबाट हुँदै आएको छ । जहाँ रहे पनि हामी नेपाली हौं । हामीलाई हाम्रो भाषा, संस्कृति, परम्परा र सभ्यता प्राण भन्दा पनि प्यारो छ ।’ उनले भनेका छन् ।
ग्रेटर जर्सी नेपाली समाज, न्यूजर्सी नेपाली समाज, गैर आवासीय नेपाली संघ, अमेरिका न्यूजर्सी च्याप्टर, एआरसी फर नेपाल, कारणका लागि महिला, फ्रेण्ड्स अफ नेपालसहित विभिन्न सामाजिक संघसंस्था र नेपाल सरकार पर्यटन प्रवद्र्धक, न्यूयोर्कको सहकार्यमा पहिलो पटक 'नेपाल डे' हुन लागेको हो ।
कार्यक्रमले नेपालको मौलिक भेषभुषा, कला, संस्कृतिको प्रबद्र्धनसंगै नेपाल र अमेरिकाको सम्बन्धलाई जनस्तरमा पुर्याउन मद्दत गर्ने प्रवद्र्धक श्रेष्ठको दाबी छ ।
'कार्यक्रम सफल बनाउनु तपाईं–हामी सबै नेपालीको दायित्व हो । कार्यक्रममा सहभागिता जनाएर नेपाली एवं नेपाली मूलका अमेरिकी नागरिकहरुले अपनत्व महशुस गराउने ऐतिहासिक अवसर पनि हो ।’ श्रेष्ठले वक्तव्यमा भनेका छन् ।
श्रेष्ठले नेपाल डे परेडमा सम्पूर्ण नेपाली समुदायका महानुभावहरुलाई सहभागिताका लागि आव्हान गर्दै सवै मिलेर सगरमाथाको देश, बुद्ध जन्मेको पवित्र भूमि नेपाल र नेपालीको कला–संस्कृति विश्वभर फैलाउन र गौरवशाली विरासतको प्रबद्र्धनमा आ–आफ्नो तर्फबाट योगदान पु¥याउन आग्रह गरेका छन् ।
कार्यक्रममा न्यूजर्सी र न्यूयोर्कका नेपाली एवं नेपाली मूलका अमेरिकीहरुको उल्लेख्य सहभागिता हुने आयोजकको दावी छ । त्यस्तै कार्यक्रममा नेपाली कला, संस्कृति झल्किने विभिन्न झाँकीका साथै नेपालका विभिन्न पर्यटकीय गन्तव्यहरुको प्रदर्शनी समेत गरिनेछ । कार्यक्रमका लागि राजेन्द्र श्रेष्ठको अध्यक्षतामा समिति गठन गरिएको छ भने सतेन्द्र शाहलाई कन्भेनर तोकिएको छ ।
