काठमाडौं । आफ्ना अध्यक्ष एवम् पूर्व प्रधानमन्त्री केपी शर्मा ओलीलाई पक्राउ गरेको विरोधमा नेकपा एमालेले देशव्यापी प्रदर्शन गरेको छ । विहान ओलीलाई बालेन सरकारले पक्राउ गरे लगत्तै सडकमा उत्रिएका एमालेका कार्यकर्ताले दिनभर र बेलुकी पनि प्रदर्शन गरे ।
एमालेले राजनीतिक, संसदीय र कानुनी क्षेत्रबाट प्रतिवाद अगाडि बढाउने निर्णय गरे लगत्तै एमाले कार्यकर्ताले आक्रोशित बने । एमाले कार्यकर्ताले गिरफ्तारी दिनुका साथै तोडफोडमा उत्रिएकाले आन्दोलन चर्किने देखिएको छ । बेलुकी ओलीको रिहाईको माग गर्दै देशभर एमालेले मशाल जुलुश निकालेको छ ।
त्यसैगरी भोलि चैत १५ गते दिउँसो १२ बजे प्रत्येक जिल्लामा पार्टी कमिटीको आयोजनामा प्रदर्शनसहित प्रमुख जिल्ला अधिकारीलाई विरोधपत्र बुझाउनुका साथै लोकतन्त्र र कानुनी राज्यका पक्षधर सबै दलहरूसँग संबाद र सहकार्य गर्ने निर्णय गरेको छ।
एमालेले नागरिक समाज र आम जनसमुदायको सहकार्यमा आन्दोलन अघि बढाउने निर्णय पनि गरेको छ।
उपाध्यक्ष विष्णुप्रसाद पौडेलले राजनीतिक दलसँग सहकार्यको पहल गर्नेछन् । अर्का उपाध्यक्ष बादलको नेतृत्वमा संसदीय क्षेत्रबाट प्रतिवादको पहलकदमी लिने निर्णय गरिएको छ । संसदीय दलहरूसँगको संवादको संयोजनको जिम्मेवारी अर्का उपाध्यक्ष रामबहादुर थापा ‘बादल’ लाई दिइएको छ भने कानुनी प्रतिवादको संयोजन गर्ने जिम्मेवारी उपाध्यक्ष गोकर्ण विष्टले पाएका छन् ।
