काठमाडौं,साउन १४ । मधेस प्रदेश सरकारले प्रदेशमा शान्ति, सामाजिक सद्भाव र सार्वजनिक सुरक्षा कायम राख्न र संयमता अपनाउन सबै पक्षलाई अपिल गरेको छ ।
मधेस प्रदेशका मुख्यमन्त्री कृष्णप्रसाद यादवको अध्यक्षतामा बिहीबार बसेको मन्त्रिपरिषद् बैठकले प्रदेशको वर्तमान शान्ति सुरक्षा अवस्थाको समीक्षा गर्दै सबै पक्षलाई संयमता अपनाउन आग्रह गरेको हो। बैठकले पछिल्ला दिनमा प्रदेशका विभिन्न जिल्लामा देखिएका सामाजिक, आर्थिक तथा सार्वजनिक सुरक्षासम्बन्धी घटनाक्रमप्रति गम्भीर ध्यानाकर्षण भएको मुख्यमन्त्री यादवद्वारा जारी विज्ञप्तिमा उल्लेख छ।
नागरिकको जिउधनको सुरक्षा, सार्वजनिक सम्पत्तिको संरक्षण तथा कानुनको प्रभावकारी कार्यान्वयनलाई उच्च प्राथमिकतामा राखेर आवश्यक कदम चाल्ने निर्णय गरिएको उनले जनाएका छन्।
प्रदेश सरकारले सुरक्षा निकाय, स्थानीय तह तथा सम्बन्धित निकायसँग आवश्यक समन्वय गरी सम्भावित सुरक्षा चुनौतीको समयमै पहिचान, रोकथाम र प्रभावकारी व्यवस्थापन गर्न प्रतिबद्ध रहेको मुख्यमन्त्री यादवले बताएका छन्।
राजनीतिक दल, संघसंस्था, धार्मिक गुरु, बुद्धिजीवी, शिक्षक, विद्यार्थी, नागरिक समाज, सञ्चारमाध्यम, निजी क्षेत्र तथा सम्पूर्ण नागरिकलाई शान्ति, सामाजिक सद्भाव, धार्मिक तथा सांस्कृतिक सहिष्णुता कायम राख्न आआफ्नो जिम्मेवारी निर्वाह गर्न हार्दिक अपिल गरिएको छ।
साथै सामाजिक सञ्जाल, सञ्चारमाध्यम वा अन्य माध्यमबाट अफवाह, भ्रम, हिंसा वा सार्वजनिक अशान्ति फैलाउन सक्ने प्रकृतिका सूचना तथा सामग्रीको सम्प्रेषण, प्रकाशन वा प्रसारण नगर्न प्रदेश सरकारले आग्रह गरेको छ। आधिकारिक निकायबाट जारी हुने सूचनालाई मात्र विश्वास गर्न पनि सबै प्रदेशवासीलाई अनुरोध गरिएको छ।
पछिल्ला घटनाबाट प्रभावित घाइतेहरूको शीघ्र स्वास्थ्यलाभको कामना गर्दै उपचारमा प्रदेश सरकारले आवश्यक सहयोग गर्ने प्रतिबद्धता व्यक्त गरिएको छ। साथै, प्रदेश सरकार शान्तिसुरक्षा, सुशासन, कानुनी शासन तथा नागरिकको संवैधानिक र कानुनी अधिकारको संरक्षणप्रति पूर्ण रूपमा प्रतिबद्ध रहेको विज्ञप्तिमा उल्लेख छ।
