काठमाडौं । अर्थमन्त्री डा.स्वर्णिम वाग्लेले ०८२ भदौ २३ र २४ गतेको घटनालाई काबुबाहिरको परिस्थिति भनेका छन् । मंगलबार (साउन २६) बसेको प्रतिनिधिसभाअन्तर्गतको सार्वजनिक लेखा समितिको बैठकमा उनले यस्तो टिप्पणी गर्दै उक्त घटना दुर्घटनाकै ‘आयाम’भित्र पर्ने बताए ।
“मलाई लाग्छ, योचाहिँ हाम्रो कानुनी भाषामा ‘फोर्स मेजर’ भन्छौँ, काबुबाहिरको परिस्थिति । फोर्स मेजरकै रूपमा डिफाइन गर्दाखेरि यसलाई दुर्घटनाकै चाहिँ आयामभित्र पर्छ जस्तो मलाई लाग्छ,” उनले भने ।
घटना किन भयो भन्नेमा फरक मत रहे पनि क्षतिबारे सबैलाई जानकारी नै भएको उनले बताए । “२३ र २४ किन भयो भन्नेमा धेरै विमति होलान् । आखैँअगाडि भएका दुर्घटना, घटना, क्षतिहरूबारे सबै जानकार छन्,” उनले भने ।
महालेखापरीक्षकको कार्यालयको प्रतिवेदनमा भदौ २३ र २४ गतेको ‘जेनजी’ आन्दोलनका बेलामा स्रेस्ता जलेका कारण एक खर्ब ४७ अर्ब रुपैयाँको लेखापरीक्षण नभएको भन्ने उल्लेख रहेको उनले बताए ।
