काठमाडौं, असोज २० । नेकपा एमालेले नेतृत्वको आलोचना गरे कडा अनुशासनको कारबाही गर्ने भएको छ । एमालेले पार्टीको नीति, निर्णय र नेतृत्वको सार्वजनिक रूपमा आलोचना, विरोध वा अपमान गर्ने नेता–कार्यकर्तालाई कारबाही गर्ने चेतावनी दिएको हो ।
यही असोज ८ गते सम्पन्न तेस्रो केन्द्रीय कमिटी बैठकको निर्णय अनुसार अबदेखि यो पार्टीका नेता कार्यकर्ताहरुले पार्टी नीति, निर्णय र नेतृत्वमाथि प्रश्न गरे सिधै कारबाहीको भागीदार बन्नुपर्ने निर्देशनसहितको अपानि पार्टी पङ्क्तिलाई पठाइएको छ ।
अध्यक्ष केपी शर्मा ओलीले हस्ताक्षर गरेर असोज १८ गते पार्टी पङ्क्तिलाई पठाएको अन्तरपार्टी निर्देशनमा पार्टीका कुनै पनि विषयमा सार्वजनिक रूपमा प्रश्न, आलोचना गरे कारबाहीको विषय बनाउन भनिएको छ ।
एमालेले पार्टीमा हुर्किँदै गएको स्वेच्छाचारिता, अराजकता र अनुशासनहीनता अन्त्य गरी एकताबद्ध र सुदृढ पार्टी निर्माण गर्न यस्तो निर्णय गर्नुपरेको जनाएको छ ।
‘पार्टीको नीति, निर्णय र नेतृत्वको विरुद्ध सार्वजनिक रूपमा आलोचना वा विरोध गर्ने, स्वेच्छाचारी, अराजक वा अनुशासनहीन क्रियाकलाप गर्ने वा गुटबन्दी गर्ने प्रवृत्तिमा पूर्णरुपमा रोक लगाउने र पार्टीमा अनुशासन पुनर्स्थापित गर्ने’, अध्यक्ष ओलीले जारी गरेको अपानिमा भनिएको छ, ‘आजसम्म जो–जसले जे–जे बोल्नुभयो वा जेसुकै गर्नुभयो, आजसम्मको छोडिदिने । केन्द्रीय कमिटीको चालू बैठकलाई कटअफ बैठक मान्ने ।’
यसअघि एमालेमा पार्टी पुनर्गठनको विषयलाई लिएर नेता कार्यकर्ताहरूले दिएको अभिव्यक्तिलाई आधार बनाएर एमालेले यस्तो निर्देशन दिएको हो ।
‘अब उप्रान्त कसैले पार्टीको नीति, निर्णय र नेतृत्वको विरुद्धमा सार्वजनिक रूपमा आलोचना, विरोध, निन्दा, अपमान गरेमा वा गुटबन्दी गरेमा वा अराजक तथा अनुशासनहीन क्रियाकलाप गरेमा स्पष्टीकरण सोध्ने र कारबाही गर्ने’, अध्यक्ष ओलीले अपानिमार्फत पार्टी कमिटीलाई भनेका छन् ।
एमालेले अब पुस्तान्तरणलाई घोषणामा नभएर प्रणालीमै बदल्ने दाबी समेत गरेको छ ।
‘प्रत्येक तहमा नेतृत्व विकासको योजना चाहिन्छ । युवा नेतृत्व केवल कोटाबाट होइन, जिम्मेवारीबाट विकास हुनुपर्छ’, एमालेको अपानिमा भनिएको छ, ‘प्रशिक्षण चाहिन्छ । वैचारिक शिक्षण चाहिन्छ । जनसम्पर्क चाहिन्छ । स्थानीय समस्या समाधानको अभ्यास चाहिन्छ । डिजिटल सञ्चारको दक्षता चाहिन्छ । नीति निर्माणमा सहभागिता चाहिन्छ । सङ्गठन चलाउने अवसर चाहिन्छ । चुनावी मैदानमा परीक्षण चाहिन्छ । परिणाम मापन चाहिन्छ ।’
महिला नेतृत्वको प्रश्न पनि यहीसँग जोडिएको भन्दै एमालेले आधा समाजलाई प्रतिकात्मक प्रतिनिधित्व दिएर पार्टी आधुनिक नबन्ने व्याख्या गरेको छ ।
एमालेले पुर्व राष्ट्रपति विद्यादेवी भण्डारीलाई अध्यक्षपछिको बरियतासहित वरिष्ठ नेता बनाउने निर्णय गरेको छ । भण्डारीलाई दोस्रो वरियता दिएर सक्रिय राजनीति गर्ने बाटो खोलेको एमालेले स्थानीय तहदेखि केन्द्रीय नेतृत्वसम्म योजना बनाएर अगाडि बढाउनुपर्ने बताएको छ ।
‘युवा र महिला नेतृत्वलाई केवल ताली पाउने मञ्चमा होइन, कठिन जिम्मेवारीमा राख्नुपर्छ । नेतृत्व सुविधा पाएर होइन, जिम्मेवारी बोकेर निर्माण हुन्छ’, एमालेले भनेको छ ।
एमाले रूपान्तरण हुने तर विचार र इतिहासलाई कमजोर बनाउन नहुने एमालेको दृष्टिकोण रहेको पनि अपानिमा भनिएको छ ।
युवा पुस्तालाई नेतृत्व हस्तान्तरणको बहस भइरहेका बेला एमालेले अहिले नै नेतृत्व हस्तान्तरणको समय र पात्र तयार नभएको बताएको छ ।
‘नेतृत्व हस्तान्तरण हुन्छ । तर त्यो विधिसम्मत हुनुपर्छ । नेतृत्व कुनै व्यक्तिको निजी सम्पत्ति होइन । पार्टी कसैको व्यक्तिगत कुरा होइन । एमाले विचारको धारा हो, जनताको भरोसा हो, कार्यकर्ताको पसिना हो, सहिदको सपना हो, सङ्घर्षको निरन्तरता हो’, हस्तान्तरणबारे अपानिमा थप व्याख्या गर्दै ओलीले भनेका छन्, ‘त्यसैले कुनै पनि नेतृत्व स्थायी हुँदैन । मैले पनि आफूलाई स्थायी ठानेको छैन । म बाटो रोक्दिनँ । म बाटो सुरक्षित बनाउन आएको हुँ । कसैले चाहेर पनि सधैँका लागि हुनै सक्दैन ।’
