काठमाडौं, असोज २० । नेपाली काँग्रेसको सभापति पदमा किशोरसिंह राठौरले उम्मेदवारी दर्ता गराउनुभएको छ ।
मंगलवार राष्ट्रिय सभा गृहमा पार्टी सभापति पदका लागि मनोनयन दर्ता गराउँदै राठौरले पार्टीलाई एकतावद्ध बनाउने आफ्नो प्रमुख एजेण्डा रहेको बताए ।
उनले आफू पार्टी सभापति निर्वाचित भए पार्टीलाई मर्यादित र अनुशासित ढंगले अघि बढाउने दाबी गरे । राजनीतिमा कुनै पनि नेतृत्व निर्विकल्प नहुने उनको भनाइ छ । उनले नेपाली काँग्रेसका संस्थापक नेता गणेशमान सिंहले समेत चुनाव हारेको र पूर्वसभापति कृष्णप्रसाद भट्टराई लामो समय सभापति भएपनि निर्विकल्प नभएको उल्लेख गर्दै राजनीतिमा कोही पनि निर्विकल्प हुन नसक्ने बताए ।
उनले पार्टी अहिले पनि ठिक ढंगले अगाडि बढ्न नसकेको टिप्पणी पनि गरे । नेतृत्व नयाँ भएर मात्र पार्टी ठिक ढंगले अघि बढ्न नसक्ने भन्दै उनले पार्टी नेतृत्वको कार्यशैली सुधार्नुपर्ने आवश्यकता रहेको समेत बताए ।
राठौरले भने ‘सभापति भएपछि पार्टी एक गर्छु । पार्टीलाई मर्यादित र अनुशासित बनाएर लिएर जान्छु । राजनीतिमा नेतृत्व भन्ने कुरा निर्विकल्प हुँदैन । चुनाव जित्दैमा कोही मान्छे निर्विकल्प हुँदैन । गणेशमानजी पनि चुनाव हार्नुभएको हो । किसुनजी त्यत्रो समय सभापति हुनुभयो निर्विकल्प त हुनुहुन्थेन नि । त्यसकारण राजनीतिमा जित र हार हुन्छ । म विशेष महाधिवेशन पक्षधर होइन । त्यसकारण मैले भनिसके सभापति भएपछि पार्टीलाई मर्यादित बनाउँछु, पार्टीमा सहयोग गर्ने मान्छेलाई रहन दिन्नँ । अब मैले चाहेको जस्तो पार्टी चाहिएको भए मलाई जिताउनुपर्यो । जे मन लाग्यो त्यही गर्ने भए मेरो भन्नु केही छैन ।’
उनले पार्टीको वर्तमान नेतृत्वले आफ्नो गृह जिल्लामा महाधिवेशन हुन नदिएको आरोप पनि लगाए । –न्युज एजेन्सी नेपाल
