काठमाण्डौं । मिटरब्याजमा ऋण लगाएर उठीबास लगाउने साहुकारहरूविरुद्ध दुई हजारभन्दा धेरै उजुरी परेका छन् । मिटरब्याजबाट पीडितहरूको समस्या सम्बोधन गर्न सरकारले गठन गरेको कार्यदलले हिजोसम्म उजुरी दिन आह्वान गरेको थियो।
कार्यदलको आह्वानअनुसार देशभरबाट २ हजार ४३ जनाले उजुरी दिएका कार्यदलका संयोजक एवम् गृह मन्त्रालयका सहसचिव डाक्टर भीष्मकुमार भुसालले जानकारी दिए । उनका अनुसार मधेस प्रदेशबाट सबैभन्दा धेरै एक हजार १८२ उजुरी परेको छ ।
वाग्मती प्रदेशबाट ३ सय ५६ र लुम्बिनी प्रदेशबाट २ सय ११ वटा उजुरी परेको छ । अरु प्रदेशबाट पनि उजुरी परेको र सङ्कलनको काम भइरहेको भुसालले जानकारी दिए । पीडितले जिल्ला प्रहरी र जिल्ला प्रशासन कार्यालयमार्फत उजुरी दिएका हुन् ।
उजुरीको अध्ययन गर्ने काम भइरहेको र भोलिदेखि स्थलगत अध्ययन सुरु हुने कार्यदलले जनाएको छ । स्थलगत अध्ययनको क्रममा अझै उजुरी आउने सम्भावना देखिएमा म्याद थपिने छ । आज बस्ने कार्यदलको बैठकले यसबारे निर्णय लिने कार्यदलका सदस्य तथा केन्द्रीय अनुसन्धान ब्युरो सिआइबीका एसएसपी दिनेश आचार्यले बताए ।
यसैबीच नवलपरासीका सर्वसाधारणलाई मिटरब्याजमा ऋण लगाएर सबैभन्दा धेरै प्रतापपुर गाउँपालिका– ९ का खुँखार साहुकार ५५ वर्षीय जगदीश कानु बानियाँले दुःख दिएका छन् । उनका तीन भाइ सुनील, सुजित र सुरेशले पनि मिटरब्याजकै धन्दा चलाइरहेका थिए । सरकारले पीडितहरूलाई उजुरी दिन आह्वान गरेपछि चारै भाइ सपरिवार भारत भागिसकेको स्थानीयले बताएका छन् । उनीहरूले बैंकमा रहेको सबै रकम पनि झिकेर लगिसकेको पीडितहरूको भनाइ छ । उनीहरूको घरमा अहिले ताला लगाइएको छ ।
फरार रहँदै आएका महोत्तरीका मिटरब्याजी अनिरुद्ध साह भने पक्राउ परेका छन् । पीडितहरूको उजुरीपछि उनी फरार थिए । प्रहरीले उनलाई आफ्नै घरबाट पक्राउ गरेको महोत्तरी प्रहरीले जनाएको छ । सरकारले गएको साउन २७ गते मिटरब्याजबाट पीडितको सम्बन्धमा छानबिन गर्न कार्यदल गठन गरेको थियो ।