बुटवल । नेपाल बन्दको बहानामा बीमा रकम हत्याउने योजना बनाएर दाङमा आफ्नै सवारीमा आगजनी गरेको खुलेको छ।
मंगलबार बिहान ५ बजेतिर घोराही उपमहानगरपालिका-३ कुइरेपानीको बबई खोलाको पुल नजिक टिपरमा आगजनी भएपछि प्रहरीले सोधपुछ गर्दा पोल खुलेको हो ।आगजनीपछि टिप धनी धनेश्वर भण्डारीले प्रहरीलाई खबर गरेका थिए। गोग्लीबाट लमहीतर्फ जाँदै गरेको रा १ ख १६९४ नम्बरको खालि टिपरमा चालक र सहचालकलाई टिपरबाट झारेर बन्दकर्ताले आगजनी गरेर फरार भएको सूचना दिइएको थियो।
जानकारी पाउनासाथ प्रहरी चौकी गोग्ली र वडा प्रहरी कार्यालय घोराहीबाट प्रहरीले दमकल लगेर आगो निभाएको थियो ।प्रहरीले टिपर धनी, चालक र सहचालकलाई जिल्ला प्रहरी कार्यालय दाङमा लगेर सोधपुछ र अनुसन्धान गर्दा टिपरमा बन्दकर्ताले नभई आफैं आगो लगाएको खुलेको हो ।
टिपरधनी धनेश्वर भण्डारीले पुरानो भएकाले टिपरमा आगो लगाएको स्वीकार गरेका प्रहरीले जनाएको छ । टिपर जलाएर बीमा दाबी गर्ने आफ्नो योजना अनुसार चालक र सहचालकलाई उनले निर्देशन दिएको खुलेको छ।
साहुको निर्देशन अनुसार चालक अरुण चौधरी र सहचालक आकाश चौधरीले उक्त टिपरमा डिजेल खन्याएर आगो लगाएको खुलेको छ।उनीहरुविरुद्ध प्रहरीले आपराधिक लाभ शिर्षकमा मुद्दा दर्ता गरेर अनुसन्धान थालेको छ ।