काठमाडौं । आजदेखि काठमाडौंमा दोस्रो राष्ट्रिय अर्थशास्त्री सम्मेलन हुँदैछ । आत्मनिर्भर तथा समुन्नत अर्थतन्त्र निर्माणमा हाम्रो अभियान भन्ने नाराका साथ हुन लागेको सम्मेलन विभिन्न सङ्घ संस्थाहरूसँगको सहकार्यमा राष्ट्रिय आर्थिक सरोकार समाज, नेपालले गर्न लागेको हो ।
अर्थतन्त्रका समसामयिक मुद्दाहरूमा बहस चलाई समाधानका उपायसहित सरकार, राजनैतिक दलहरू तथा नीति निर्माणमा संलग्न निकायहरूलाई कार्यान्वयनको लागि सुझाव दिने उद्देश्यका साथ दोस्रो अर्थशास्त्री सम्मेलन गर्न लागिएको आयोजक संस्थाले जनाएको छ ।
दुई दिने सम्मेलनलाई पहिलो दिन उद्घाटन सत्र र दोस्रो दिन प्राविधिक सत्र गरी विभाजन गरिएको आयोजक संस्थाले जारी गरेको प्रेस विज्ञप्तिमा उल्लेख छ । प्रधानमन्त्री पुष्पकमल दाहाल प्रचण्ड प्रमुख अतिथि रहने पहिलो दिनको कार्यक्रम काठमाडौंको राष्ट्रिय सभागृहमा दिउसो २ बजे सुरु हुने र दोस्रो दिनको कार्यक्रम बिहान ७ बजेदेखि होटेल एलो प्यागोडा जमलमा सुरु हुने समय तालिका छ ।
अर्थशास्त्री सम्मेलनमा प्रधानमन्त्रीका साथै पूर्व प्रधानमन्त्रीहरू, पूर्व अर्थमन्त्रीहरू, राजनीतिक पार्टीका प्रतिनिधिहरू, राष्ट्रिय योजना आयोगका वर्तमान तथा पूर्व उपाध्यक्षहरू, राष्ट्र बैङ्कका गभर्नर तथा पूर्वगभर्नरहरु सहभागी हुनेछन् ।
पछिल्लो दशकमा बढ्दै गएको अनियन्त्रित आयातले राष्ट्रिय उद्योगलाई धराशायी बनाउँदै मुलुकलाई परनिर्भर र आर्थिकरुपमा थप अस्थिर बनाउँदै लगेको छ । बैंक तथा वित्तीय संस्थाहरुबाट हुने लगानी पनि उत्पादनशील क्षेत्रमा परिचालन हुन सकिरहेको छैन ।
हाल बैंकिङ क्षेत्रमा देखिएको तरलता समस्या तथा बढ्दो ब्याजदरले लगानीको वातावरण बन्न सकिरहेको छैन । यसै परिस्थितिलाई मध्यनजर गर्दै लगानीमैत्री वातावरण निर्माण, स्वदेशी उद्योगको प्रवर्द्धनमा र सूचना प्रविधि क्षेत्रमा टेवा पुर्याउन अर्थतन्त्रका विभिन्न विषयवस्तुहरूमाथि यस सम्मेलनमा छलफल हुने बताइएको छ ।
