काठमाडौं । आयरल्यान्ड ए विरुद्धको पहिलो टी–२० खेलमा घरेलु टोली नेपाल ए २१ रनले पराजित भएको छ । हारसँगै नेपाल तीन खेलेको श्रृंखलामा १ -० ले पछि परेको हो ।
त्रिवि क्रिकेट मैदानमा आयरल्यान्ड ए दिएको नेपाल ए १९ ओभर ३ बलमा २०१ रनमा अलआउट भयो । जित नजिक पुगेर पनि नेपाल लय गुमाउँदा पराजित भयो । एक समय ४ विकेटको क्षतिमा १८९ रन बनाएर जित्ने स्थितिमा रहेको नेपालले १३ रन जोड्दा बाँकी छ विकेट गुमायो । सेट ब्याटर लोकेश बम र आरिफ शेखको प्रस्थानपछि अन्य ब्याटरले कुनै बाउन्ड्री प्रहार गर्न सकेनन् । कमजोर फिनिसिङकै कारण नेपाल हार बेहोर्न पुग्यो ।
लोकेश आउट हुँदा नेपाललाई २४ बलमा ३४ रन चाहिएको थियो ।ओपनर लोकेशले ५६ बलमा ९ चौका र ८ छक्कासहित १ सय ६ रन जोडे । उनी १६ औं ओभरको अन्तिम बलमा ठूलो सट खेल्ने धुनमा आउट भए । त्यसपछि आरिफ आउट हुँदा पनि नेपाल बलियो स्थितिमा थियो । आरिफ २६ बलमा ५ छक्का र १ चौकाको मद्दतले ४९ रन बनाए । आरिफ र लोकेशले चौथो विकेटका लागि १ सय २१ रनको साझेदारी गरेका थिए । नेपालका चार ब्याटरले खाता खोल्न सकेनन भने अरु मध्ये दोहोरो अंकमा विनोद भण्डारीले मात्रै १६ रन जोडे ।
यसअघि आईरिस टोलीले निर्धारित २० ओभरमा ५ विकेट गुमाउँदै २ सय २२ रन बनाएको थियो । आयरल्यान्डका पिटर मुरले ३२ बलमा ४ चौका र ३ छक्कासहित सर्वाधिक ४९ रन बनाए । कप्तान निल रकले २३ बलमा १ चौका र ३ छक्काको सहयोगमा ३८ रन बनाए। केड कार्माइकलले २९ बलमा ४ चौका र १ छक्काको सहयोगमा ३८ रन बनाए।
स्टेफन डोहेनीले १६ बलमा ४ चौका र २ छक्काको सहयोगमा ३४ रन बनाए।गारेथ डिलेनीले १४ बलमा २ चौका र ३ छक्काको सहयोगमा ३० रन बनाएका थिए। डिलेनीले अन्तिम ओभरमा मात्र ३ छक्का र १ चौका प्रहार गरेका थिए।नेपालका लागि कमलसिंह ऐरीले ३ तथा सागर ढकाल र आरिफ शेखले समान १र१ विकेट लिए।
नेपालका कमलसिंह ऐरीले ४ ओभरमा ३९ रन खर्चेर ३ विकेट लिए । आरिफ शेख र सागर ढकालले १–१ विकेट लिए ।
