काठमाडौं । कप्तान रोहित पौडेलको शानदार शतकमा नेपालले वेष्ट इण्डिज ए विरुद्ध टी-२० सिरिजमा विजयी सुरुवात गरेको छ।
नेपालले वेष्ट इन्डिजलाई ४ विकेटले हराएको हो। जितसँगै नेपालले पाँच खेलको सिरिजमा १–० ले अग्रता लिएको छ।
वेष्ट इण्डिज ए ले दिएको २ सय ५ रनको लक्ष्य नेपालले २ बल बांकी छंदै ६ विकेटको क्षतिमा भेट्टायो। नेपालका लागि कप्तान रोहितले सर्वाधिक १ सय १२ रनको योगदान दिए। रोहितले ५४ बलमा १० चौका र ६ छक्का हाने। उनले ४७ बलमा १० चौका र ५ छक्का मद्धतमा शतक पूरा गरे ।
दिपेन्द्र सिंह ऐरिले २४ रन थपे। उनले १८ बलमा २ चौका र १ छक्का हाने। ओपनर कुशल भुर्तेल १६ रन बनाउँदा क्याच आउट भए। कुशल मल्ल १६ र अनिल साह ५ रन बनाएर आउट भए। विवेक यादव ७ रनमा बोल्ड भए। गुल्सन झा ९ र प्रतिश जिसी ५ रनमा नटआउट रहे।
त्यसअघि त्रिवि क्रिकेट मैदान कीर्तिपुरमा टस हारेर पहिले ब्याटिङ गरेको पाहुना टोली वेष्टइण्डिज ए ले २० ओभरमा ५ विकेट गुमाउँदै २०४ रन बनायो । वेष्टइण्डिज ए का कप्तान रोस्टन चेसले ४६ बलमा ९ चौका र २ छक्कासहित सर्वाधिक ७४ रन बनाए ।
ओपनर एलिक एथानाजे २५ बलमा ५ चौका र ३ छक्कासहित ४७,केसी कार्टी २६ बलमा २ चौका र ३ छक्कासहित ३८ रनमा आउट भए ।कदिम एलियन १५ बलमा २ चौकासहित १४ रनमा नट आउट रहे ।आन्द्रे फ्लेचर १३ रनमा आउट भए । नेपालका कमलसिंह ऐरी, दीपेन्द्रसिंह ऐरी, रोहित पौडेल र अभिनाश बोहराले १/१ विकेट लिए ।
