काठमाडौं । डोल्पाको त्रिपुरासुन्दरी नगरपालिका–४ स्थित सामुदायिक वनमा लागेको डढेलोमा परेर तीन जना बालक गम्भीर घाइते भएका छन् ।
च्याउ टिप्न गएका १२, १३ र १० वर्षका तीन बालक घाइते भएको डोल्पाका प्रमुख जिल्ला अधिकारी तुलसीप्रसाद दाहालले जानकारी दिए । उनका अनुसार, दिउँसो घर नजिकैको सामुदायिक वनमा च्याउ टिप्न जाँदा उनीहरु डढेलोमा परेका थिए ।
गम्भीर घाइते उनीहरुलाई दुनैमा उपचार सम्भव नभएपछि काठमाडौंका लागि रिफर गरिएको छ । तर, मौसमका कारण हेलिकोप्टर अवतरण गर्न समस्या भइरहेको छ ।
डोल्पामा गएको सोमबार मष्टाभवानी सामुदायिक वनमा लागेको डढेलो निभाउने क्रममा जार जना सैनिक समेत गम्भीर घाइते भएका थिए । तीमध्ये तीन जनाको उपचारका क्रममा निधन भएको छ ।