काठमाडौं । गण्डकी प्रदेशका मुख्यमन्त्री खगराज अधिकारीले सर्वोच्च अदालतको वैशाख १० को पेशी अघि नै विश्वासको मत लिने तयारी गरेका छन् ।
मन्त्रिपरिषद्को मङ्गलबार बसेको बैठकले त्यसै अनुसार प्रदेश सभा अधिवेशन बोलाउन प्रदेश प्रमुख डिल्लीराज भट्टलाई सिफारिस गर्ने निर्णय गरेको छ । वैशाख ७ गते अधिवेशन बोलाउन सिफारिस पत्र प्रदेश प्रमुख कार्यालयमा पुगेको छ । गृह जिल्ला रहेका प्रदेश प्रमुख बुधवार पोखरा फर्किनेछन् । प्रदेश प्रमुख फर्किएपछि आजै अधिवेशन आह्वान गर्ने तयारी भइरहेको छ ।
सर्वोच्च अदालतले मुख्यमन्त्री अधिकारी नेतृत्वको गण्डकी प्रदेश सरकारलाई दीर्घकालीन असर पर्ने निर्णयहरू नगर्न अन्तरिम आदेश दिएको छ । सर्वोच्चका न्यायाधीश विनोद शर्माको एकल इजलासले चैत २८ गते सरकारलाई नियमित कार्य सञ्चालन बाहेकका काम नगर्न रोक लगाएको हो । अर्को पेशी वैशाख १० लाई तोकिएको छ । तर, मुख्यमन्त्रीले त्यस अगावै विश्वासको मत लिने तयारीमा जुटेका छन् ।
एमाले संसदीय दलका नेता अधिकारीले सभामुख धिताललाई समेत माओवादी दलको सदस्यमा गणना गरेर चैत २५ गते मुख्यमन्त्रीमा दाबी पेस गरेका थिए । प्रदेश प्रमुख भट्टले पनि त्यही दिन अधिकारीलाई मुख्यमन्त्री नियुक्त गरेपछि निवर्तमान मुख्यमन्त्री सुरेन्द्रराज पाण्डे सर्वोच्च पुगेका थिए ।
सभामुख माओवादीबाट भएकाले गठबन्धनलाई बहुमत पुग्दैन । अर्कोतर्फ माओवादी संसदीय दलमा रहेको नेसपा सांसद फडिन्द्र देवकोटा पनि यो गठबन्धनलाई साथ नदिने मनस्थितिमा छन् । राप्रपा हालसम्म अनिर्णित छ । राप्रपा अनिर्णित हुँदा सरकारले विश्वासको मत पाउने सम्भावना देखिँदैन ।
यसैबीच मुख्यमन्त्री अधिकारीले बुधबार बिहान प्रधानमन्त्री पुष्पकमल दाहाल प्रचण्डलाई भेटेका छन् । भेटमा गण्डकीको सत्ताको बारेमा छलफल भएको छ ।प्रधामन्त्रीसँगको भेटमा प्रदेशका विकासबारे छलफल गरेको भन्दै मुख्यमन्त्री अधिकारीले सामाजिक सञ्जालमा मार्फत तस्बिर सार्वजनिक गरेका छन् । तर, गण्डकी प्रदेश मन्त्रिपरिषद्ले प्रदेश प्रमुख डिल्लीराज भट्टलाई विशेष अधिवेशन डाक्न सिफारिस गरेलगत्तै मुख्यमन्त्री अधिकारीले प्रधानमन्त्रीलाई भेट्नुलाई अर्थपूर्ण रुपमा हेरिएको छ।
