दीपेन्द्र कुँवर-
किङ्सटाउन। टी–ट्वेन्टी विश्वकप अन्तर्गत नेपालले बंगलादेशविरुद्ध टस जितेर बलिङ रोजेको छ । सेन्टभिन्सेटको आर्सेन भाले रंगशालामा कप्तान रोहितकुमार पौडेलले टस जितेर बंगलादेशलाई ब्याटिङको निम्तो दिएका हुन् । नेपालले एक परिवर्तन गरेको छ । नेपालले आज तीब्र गतिका बलर करण केसीलाई आराम दिएर ब्याटर सन्दीप जोरालाई मौका दिएको छ । सन्दीप मिडल अर्डरका ब्याटर हुन् ।
यसअघि नै विश्वकपबाट बाहिरिसकेको नेपाल बंगलादेशविरुद्ध जित निकाल्दै सुखद अन्त्य गर्ने योजनामा छ भने बगंलादेश सुपर एटमा पुग्न जित्नै पर्ने दबाबमा छ ।
दक्षिण अफ्रिकासँग १ रनले हारेपछि नेपालको विश्वकपको सुपर ८ खेल्ने सपना समाप्त भएको छ भने नेपालको त्यही हारले बंगलादेशको सुपर एट संभावना बलियो भएको छ । तर बंगलादेशका लागि पनि सहज हुने छैन ।
बंगलादेश नेपालसँग पराजित भए र नेदरल्यान्ड्सले श्रीलंकाविरुद्ध जित निकाल्दै नेट रनरेटमा अघि रहे बंगलादेश पनि विश्वकपबाट बाहिरिनेछ। दक्षिण अफ्रिकाविरुद्ध नेपालको प्रदर्शनका कारण बंगलादेश नेपाली टोलीसँग सशंकित छ ।
