काठमाडौं । चार पटकको विश्व च्याम्पियन इटाली लगातार तेस्रोपटक फिफा विश्वकपमा छनोट हुन असफल भएको छ ।
युरोपियन प्लेअफको फाइनलमा बोस्निया–हर्जेगोभिनासँग पेनाल्टी सुटआउटमा पराजित भएपछि इटालीको यात्रा टुंगिएको हो । यसअघि पनि इटाली २०१८ (रुस) र २०२२ (कतार) विश्वकपमा छनोट हुन सकेको थिएन । कुनै पनि विश्व च्याम्पियन टोली लगातार तीन पटक छनौट हुन असफल भएको पहिलो पटक हो ।
प्लेअफको फाइनलमा इटाली बोस्निया हर्जगोभिनासँग पेनाल्टी सुटआउटमा ४–१ गोलअन्तरले स्तब्ध भयो । निर्धारित ९० र अतिरिक्त ३० मिनेटको खेल १–१ गोलको बराबरीमा टुंगिएपछि खेलको नतिजा पेनाल्टी सुटआउटबाट लिइएको थियो ।
तर, पेनाल्टी सुटआउटमा इटाली अभागी सावित भयो । बोस्नियाका ४० वर्षीय कप्तान इडिन डेज्कोले इतिहासमा दोस्रोपटक टिमलाई विश्वकपमा पुर्याउन सफल भए । पेनाल्टीमा इटालीका पियो एस्पोसिटो र ब्रायन क्रिस्टेन्टको गोल गर्न सकेनन् । एस्पोसिटोको प्रहार आकाशियो भने ब्रायनको प्रहार क्रसबारको तल्लो भागमा लागेर बाहिरिएको थियो ।
बोस्नियाका लागि पेनाल्टीमा बेन्जामिन ताहिरोभिक, हरिस ताबाकोविच, केरिम अलाजबेगोभिक र एस्मिर बज्रकटारेभिकले गोल गरे ।
त्यसअघि खेलको १५औँ मिनेटमा मोइस केनले गोल गर्दै इटालीलाई सुरुवाती अग्रता दिलाएका थिए । तर, पहिलो हाफ सकिन पाँच मिनेट बाँकी हुँदा डिफेन्डर अलेसान्द्रो बास्टोनी रातो कार्ड खाँदै मैदानबाट बाहिरिएपछि इटाली १० खेलाडीमा सीमित भएको थियो ।
खेलको ७९औँ मिनेटमा बोस्नियाका लागि हरिस टाबाकोभिकले गोल गर्दै खेल १–१ गोलको बराबरीमा ल्याए । १० खेलाडीमा सीमित इटालीले अन्तिम समयसम्म बोस्नियालाई १–१ गोलको बराबरीमै रोकेर खेल पेनाल्टी सुटआउटसम्म पु¥याएको थियो । तर अन्तिममा हारबाट जोगिन सकेन् ।
