न्युयोर्क । नेपाली मूलका युवा नेता सतीश चापागाईं मेरिल्यान्ड राज्यको हाउस अफ डेलिगेट्स बन्न प्रतिस्पर्धामा उत्रिएका छन् ।
सन् २००८ देखि अमेरिकामा बस्दै आएका चापागाईंले अमेरिकाको मेरिल्याण्डको डिष्ट्रिक ७ ए बाट स्टेट डेलिगेटका लागि चुनावी अभियान शुरु गरेका हुन । उनले गत महिना नै उमेद्वारी दर्ता गराएको चुनावी प्रचार अभियानको कार्यक्रममा जानकारी गराए ।
मेरिल्याण्डमा रहेका नेपालीहरुको भव्य उपस्थितीका बीचमा चापागाईले सहयोगको लागि अनुरोध पनि गरे । आगामी नोभेम्बरमा हुने निर्वाचनका लागि मेरिल्याण्डमा राज्यमा यहि जुन २३ मा प्राईमरी निर्वाचन हुँदैछ ।
चापागाईको डिष्ट्रिकमा उनको डेमोक्रेटिक पार्टीको प्राईमरीमा २ सिटका लागि ४ जनाको उम्मेदवारी परेको छ । उनले डेमोक्रेटिक पार्टीभित्र प्राईमरी लड्न लागेका हुन् । चापागाईसंगै लिडिया ब्राउन, चम बेकर र क्लिभलेण्ड रेनोल्ड जुनियर प्रतिस्पर्धामा छन् ।
चापागाई अहिले सोही डिष्ट्रिकबाट पार्टीको केन्द्रीय सदस्य छन् । चार बर्ष अगाडी चापागाईले ४ हजार १ सय मत ल्याएर पार्टीको केन्द्रीय सदस्य जितेका थिए । प्राईमरीमा निर्वाचन जिते भने चापागाईले रिपब्लिकन उमेद्वारसंग नोभेम्बरमा पुनः निर्वाचन लड्नुपर्ने छ ।
पछिल्लो मतगणना अनुसार ८३ हजार जनसंख्या रहेको यस डिष्ट्रिकमा ४ प्रतिशत एशियन मूलका मानिस बसोबास गर्दछन ।प्रतिशतका आधारमा यो क्षेत्रमा ४४.९ प्रतिशत रिपब्लिकन, ३४. ७ प्रतिशत डेमोक्र्याट र १८.९ ईन्डिपेन्डेन्ट मतदाता छन् ।
