काठमाडौं । प्रधानमन्त्री कपमा सहभागी क्रिकेटर अनुज चनाराले अबदेखि कर्णाली टीमबाट नखेल्ने घोषणा गरेका छन् । आफूलाई लगातार अवसरबाट वञ्चित गरिएको भन्दै उनले नखेल्ने घोषणा गरेका हुन् ।
सामाजिक सञ्जालमा स्टाटस लेख्दै चनाराले विगत २ वर्षदेखि आफूलाई टोलीमा आफूलाई गरिएको व्यवहारप्रति असन्तुष्टि जनाएका छन् । ५० ओभरको खेलमा प्राय ३(४ ओभरमात्र बलिङ गर्न दिइने र एउटा खेलमा विकेट लिन नसक्दा टीमबाट बाहिर राखिने गरेको उनको गुनासो छ ।
‘मलाई प्लेइङ ११ मा राखिए पनि ५० ओभरको खेलमा प्रायः ३–४ ओभर मात्र बलिङ गर्न दिइन्थ्यो । सुरुवाती ओभरमै १(२ विकेट लिँदा पनि मलाई पूरा १० ओभरको स्पेल दिइएन ।' चनाराले लेखेका छन्,त्यसपछि हरेक खेलमा २-४ ओभर मात्र अवसर दिइयो, र जब विकेट लिन सकिनँ, लगातार २-३ खेलमा टोली बाहिर राखियो । कप्तान र कोचसँग बारम्बार प्रश्न गर्दा ‘स्पिन ट्र्याक छ’ भन्ने जवाफ मात्र पाइन्थ्यो ।’
चनाराले २०८१ मा दाङमा भएको खेलमा पुलिस क्लवविरुद्ध १० ओभर बलिङ गर्दै २९ रन दिएर ४ विकेट लिएका थिए । यस वर्ष उनले सुदुरपश्चिमविरुद्ध ५ ओभरमा ३३ रन दिएर २ विकेट लिए । त्यसपछिको २ खेलमा २-३ ओभरमात्रै बलिङ गर्न पाएको र त्यसमा विकेट नलिएपछि लगातार ३ खेलमा बाहिर राखिएको उनले गुनासो गरेका छन् ।
चनारा विगत ५-६ वर्षदेखि कर्णाली प्रदेशबाट क्रिकेट खेल्दै आएका छन् । कर्णाली प्रदेशबाट राष्ट्रिय टोलीको क्याम्पसम्म पुग्ने आफू पहिलो खेलाडी भएको उनको दावी छ ।
‘मैले सँधै कर्णाली प्रदेशको लागि आफ्नो तर्फबाट सक्दो योगदान दिएको छु । तर, विगत ३ वर्षदेखि टोलीबाट मैले पाएको व्यवहारका कारण आज म यो लेख्न बाध्य भएको छु । मैले कप्तानसँग सोध्दा ‘माथिबाट जे आदेश आउँछ, त्यही गर्छु’ भन्ने जवाफ पाइयो । यी सबै परिस्थितिलाई मध्यनजर गर्दै, मैले आजदेखि कर्णाली प्रदेशबाट नखेल्ने निर्णय गरेको छु ।’
