काठमाडौं । भारतको दक्षिण दिल्लीमा रहेको एक होटलमा बुधबार बिहान भीषण आगलागी हुँदा २१ जनाको मृत्यु भएको छ ।
दर्जनौँ घाइते भएका छन् । पछिल्ला वर्षहरूमा राजधानीमा भएको सबैभन्दा घातक आगलागीका रूपमा यस घटनालाई प्रहरीले पुष्टि गरेको छ ।
दिल्लीको दक्षिणी भागमा रहेको भीडभाडयुक्त बस्तीमा अवस्थित बेड–एन्ड–ब्रेकफास्ट ‘फ्लोरिस स्टे’ होटलमा बुधबार बिहान आगलागी भएको हो । आगो तीव्र रूपमा फैलिँदा भवनभित्र रहेका पाहुना र कर्मचारी फस्न पुगेका थिए ।
उद्धार तथा खोजी कार्य जारी रहँदा ४० भन्दा बढी घाइतेलाई उपचारका लागि नजिकैका अस्पतालमा भर्ना गरिएको प्रहरीले जनाएको छ । घटनास्थलमा आठ वटा दमकल परिचालन गरी लामो प्रयासपछि आगो नियन्त्रणमा लिइएको हो ।
आगलागीपछि धुवाँले भरिएको भवनबाट ज्यान जोगाउन मानिसहरू भागाभाग गर्ने क्रममा त्रासपूर्ण अवस्था सिर्जना भएको थियो।
‘फ्लोरिश स्टे बी एन्ड बी’ नामक उक्त प्रतिष्ठानलाई दिल्ली सरकारले सञ्चालन गरेको ‘बेड एन्ड ब्रेकफास्ट’ योजनाअन्तर्गत सञ्चालन अनुमति (लाइसेन्स) प्रदान गरेको भारतिय सञ्चारमाध्यमले जनाएका छन् ।
घटनास्थलबाट प्राप्त दृश्यहरूमा दुई महिलाले आगो र बाक्लो धुवाँबाट बच्नका लागि भवनबाट हाम फालेको देखिएको छ।
अधिकारीहरूले आगो नियन्त्रणमा लिन र भवनभित्र फसेकाहरूको उद्धार गर्न आठ वटा दमकल घटनास्थलमा खटाइएको बताएका छन्। एक आधिकारिक विज्ञप्तिअनुसार, आगलागीबारे जानकारी दिल्ली अग्नि सेवा (डीएफएस) लाई बिहान करिब ९ बजे प्राप्त भएको थियो।
समाचार संस्था पीटीआईका अनुसार, डीएफएसका एक अधिकारीले प्रारम्भिक उद्धार तथा नियन्त्रण प्रयासमा दुई वटा वाटर टेन्डर, दुई वटा वाटर बाउजर, एक द्रुत प्रतिक्रिया सवारीसाधन तथा अन्य अग्नि नियन्त्रण उपकरण परिचालन गरिएको जानकारी दिएका छन्।
आगलागीमा घाइते भएका व्यक्तिहरूलाई उपचारका लागि नजिकका अस्पतालहरूमा पठाइएको छ ।
