काठमाडौं। एसियन गेम्स क्वालिफायर अन्तर्गत आज भएको खेलमा मलेसियालाई हराउँदै नेपाल समूह विजेता बनेको छ ।
सिंगापुरमा भएको खेलमा नेपालले मलेसियालाई १६७ रनले हरायो ।एक खेलअघिनै एसियन गेम्समा स्थान बनाएको नेपाल यो जितसँगै समूह विजेता बन्यो । पराजित भएपनि समूह उपविजेताका रुपमा मलेसिया पनि एसियन गेम्सका लागि छनौट भएको छ ।
२७६ रनको विशाल लक्ष्य पछ्याएको मलेसियाले निर्धारित २० ओभरमा ९ विकेट गुमाएर १ सय ८ रनमात्रै बनाउन सक्यो ।
उसका लागि कप्तान सय्यद अजीजले ५४ रन जोड्दा सार्विन मुनियान्दीले १८ तथा मुहम्मद हजिजले १३ रन बनाउँदा अन्य ब्याटरले दोहोरो अंकमा रन बनाउन सकेनन्।
मलेसियालाई सस्तैमा समेट्न नेपालका शेर मल्लले तीन विकेट लिए भने करण केसी, सोमपाल कामी, सन्दीप लामिछाने, दीपेन्द्र सिंह ऐरी र कुशल मल्लले एक–एक विकेट हात पारे।
त्यसअघि टस हारेर ब्याटिङ गरेकाे नेपालले २० ओभरमा ७ विकेटको क्षतिमा २७५ रन जोड्यो। ओपनर कुशल भुर्तेलले शतकीय इनिङ्स खेले। उनले १२६ रन जोडे। ५४ बल खेलेका उनले १४ चौका र ८ छक्का प्रहार गरे।
टी २० आईमा उनको यो तेस्रो शतक हो।
यस्तै, आसिफ शेखले २४ बलमा ६८ रनको आक्रामक पालि खेले। उनले ७ छक्का र ५ चौका प्रहार गरे। दीपेन्द्र सिंह ऐरीले ११ बलमा ३१ रन जोडे। उनले ४ छक्का र १ चौका हाने ।
बलिङतर्फ मलेसियाका विरनदीप सिंहले तीन तथा सय्यद अजिज र विजय उन्नीले दुई–दुई विकेट लिए।
