काठमाडौं । जित्नै पर्ने खेलमा थाइल्याण्डसँग पराजित भएपछि नेपाली महिला क्रिकेट टिम एसिया कपमा छनौट हुन असफल भएको छ । निराशाजनक ब्याटिङ गर्दै नेपाल एसिसी महिला प्रिमियर कपको क्वाटरफाइनलमा थाइल्याण्डसँग ५७ रनले पराजित भएको हो ।
जितको लागि १ सय ३१ रनको लक्ष्य पछाएको नेपाल २० ओभरमा ७ विकेट गुमाउँदै मात्र ७४ रनमा सीमित भयो । थाइल्यान्डसँग नेपालको यो नवौं हार हो। २०१९ यताका कुनै पनि खेलमा नेपालले थाइल्यान्डलाई हराउन सकेको छैन।
खराब शुरुवात गरेको नेपालले साझेदारीनै गर्न सकेन । सीता रानामगर र रुबिनाले क्षत्रीले गरेको ३० रनको साझेदारीनै सर्वाधिक रह्यो । नेपालका लागि रुबिनाले सर्वाधिक २० रन जोडेर नटआउट रहिन् । सीताले पनि नटआउट १२ रन बनाईन् । सम्झना खड्काले १२, सोनी पाख्रिनले १५, कप्तान इन्दु वर्मा ७, कविता जोशीले ४, पूजा महतो २ र कविता कुँवर १ रनमा आउट भए ।
बलिङमा थाइल्याण्डका थिपात्चा फुटवोङ, सुनिदा चतुरोङग्रात्ना र सुलिपोन लाओमीले समान २ विकेट लिए।
त्यसअघि मलेसियाको क्वालालम्पुर स्थित वायुमास ओभल स्टेडियममा टस जितेर थाइल्याण्डले पहिले ब्याटिङ रोज्यो। उसले २० ओभरमा ४ विकेट गुमाउँदै १ सय ३० रनको योगफल बनाएको थियो ।
