काठमाडौं । दक्षिण कोरियालाई हराउँदै मेक्सिको विश्वकप फूटबलको नकआउट चरणमा प्रवेश गरेको छ ।
समूह ए को विजेता बन्दै आयोजक मेक्सिको एक खेल बाँकी छँदै नकआउट चरणमा प्रवेश गरेको हो ।
आज विहान भएको खेलमा दक्षिण कोरियालाई शून्यका विरुद्ध एक गोलले हराउँदै मेक्सिको २ जितसहित ६ अंक बटुलेर नकआउट चरण प्रवेश गरेको हो ।
मेक्सिकोको ग्वाडालजारा स्टेडियममा भएको खेलमा घरेलु टोलीका लागि ५० औं मिनेटमा लुइस रोमोले गरेको एकमात्रै गोल निर्णायक भयो ।
खेल भर बल पोसेसन र पास एक्युरेसीमा पनि दक्षिण कोरिया अगाडि रहे पनि गोल गर्न सकेन् ।
समूह ‘ए’ बाट ६ अंक जोड्दै मेक्सिको नकआउट चरणमा पुग्दा ३ अंक जोडेको दक्षिण कोरियाको पनि सम्भावना कायमै छ । पहिलो खेलमा मेक्सिकोले दक्षिण अफ्रिकालाई हराएको थियो ।
दक्षिण कोरियाले चेक रिपब्लिकलाई हराएको थियो । मेक्सिको नकआउट चरणमा पुग्ने पहिलो टोली बनेको छ । सन् २०१८ को विश्वकपमा अन्तिम–१६ सम्म पुगेको मेक्सिको सन् २०२२ मा समूह चरणबाटै बाहिरिएको थियो ।
नकआउट चरणमा ३२ टोली पुग्नेछन् । प्रत्येक समूहबाट शीर्ष दुई टोली र तेस्रो हुने मध्येबाट ८ टोली राउन्ड अफ ३२ मा प्रवेश गर्नेछन् ।
