काठमाडौं । फिफा विश्वकपमा केप भर्डेको उत्साहजनक यात्रा अर्जेन्टिनासँगको ३–२ को हारसँगै शुक्रवार टुङ्गिएको छ । मैदानमा टोली पराजित भएपनि यस प्रदर्शनले स्वदेशमा भने नयाँ उत्साह र ऊर्जा सञ्चार गरेको छ । विशेषगरी राजधानी प्राइयामा रहेका बालबालिकाहरूमा राष्ट्रिय टोली ‘ब्लु साक्र्स’ बाट खेल्ने सपना पलाउन थालेको छ ।
इन्टिग्रेटेड फुटबल डेभलपमेन्ट स्कूलका प्रशिक्षार्थीहरू सुकुपिरा मैदानमा उत्साहका साथ फुटबलको आधारभूत सीप सिक्न व्यस्त देखिन्छन् । नीलो जर्सीमा सजिएका ती युवा खेलाडीहरूले पासिङ ड्रिल र सुटिङ अभ्यास गरिरहँदा अभिभावकहरूले मैदान बाहिरबाट उनीहरूलाई हौसला प्रदान गरिरहेका छन् । इपिआइएफका अध्यक्ष पेड्रो बेटेनकोर्टकाअनुसार विश्वकपमा केप भर्डेको उपस्थितिले फुटबललाई केवल खेलको रूपमा मात्र नभई उज्ज्वल भविष्यको मार्गका रूपमा हेर्ने अभिभावकहरूको सङ्ख्यामा वृद्धि भएको छ ।
‘विश्वकपमा राष्ट्रिय टोलीको पहुँचसँगै फुटबलले आफ्ना बालबालिकालाई अन्तर्राष्ट्रिय स्तरसम्म पु¥याउन सक्छ भन्ने विश्वास अभिभावकहरूमा पलाएको छ’ बेटेनकोर्टले भने । उनले थपे, ‘हालका साताहरूमा फुटबल एकेडेमीहरूमा आफ्ना छोराछोरीलाई भर्ना गर्न चाहने अभिभावकहरूको रुचि निकै बढेको छ ।’
युवा खेलाडीहरूले राष्ट्रिय टोलीका सदस्यहरूलाई टाढाका ताराका रूपमा नभई आफ्नै प्रेरणाको स्रोत र उदाहरणका रूपमा हेर्न थालेका छन् । बेटेनकोर्टकाअनुसार बालबालिकाहरू भोजिन्हा, रायन, स्टोपिरा र जोभान काब्राल जस्ता खेलाडीहरू जस्तै बन्न चाहन्छन् । आफ्ना देशका खेलाडीहरूले मेसी र क्रिस्टियानो रोनाल्डो जस्ता विश्वचर्चित खेलाडीहरूसँगै एउटै मञ्च साझा गरेको देख्दा उनीहरूमा थप हौसला मिलेको छ ।
इपिआइएफमा प्रशिक्षणरत युवा गोलरक्षक डिओगो सिल्भा कारखबजिय राष्ट्रिय टोलीका गोलरक्षक भोजिन्हाका ठूला प्रशंसक हुन् । उनले भोजिन्हाको हस्ताक्षर भएको बुट समेत सुरक्षित राखेका छन् । ‘भोजिन्हाले स्पेनविरुद्ध उत्कृष्ट प्रदर्शन गरेका थिए । म पनि गोलरक्षक भएकाले उनकै पदचाप पछ्याउन चाहन्छु’ डिओगोले बताए ।
अर्का युवा खेलाडी लियामले राष्ट्रिय टोलीका सदस्य टेल्मो आर्काञ्जो जस्तै वा त्योभन्दा पनि राम्रो खेलाडी बन्ने लक्ष्य राखेका छन् । उनी भन्छन्, ‘मलाई गोल गर्न र टोलीका साथीहरूसँग खेल्न असाध्यै मन पर्छ । फुटबलमा भविष्य बनाउन चाहनेले सुरुमा एकेडेमीमा आएर आधारभूत कुराहरू सिक्नु आवश्यक छ ।’
केप भर्डेको यसपटकको विश्वकप यात्राले मैदानमा नतिजा सोचेजस्तो नदिए पनि देशको फुटबलको भविष्यका लागि भने एउटा बलियो जग बसालेको देखिएको छ
सिन्ह्वाको सहयोगमा न्युज एजेन्सी नेपालले तयार पारेको समाचार सामग्री ।
