काठमाडौं,साउन १८ । साउन महिनाको तेस्रो सोमवार आज काठमाडौंको पशुपतिनाथ मन्दिरसहित मुलुकभरका विभिन्न शिवालयहरूमा भक्तजनको ठूलो घुइँचो लागेको छ ।
विशेष गरी सोमवारको दिन भगवान शिवको पूजा–आराधना र दर्शनका लागि बिहानैदेखि श्रद्धालुहरूको उल्लेख्य उपस्थिति देखिएको हो । पशुपतिनाथ मन्दिरमा आज बिहानैदेखि भक्तजनहरू लामवद्ध भएर दर्शन गरिरहेका छन् । साउन महिना र सोमवारको विशेष धार्मिक महत्वका कारण पशुपति क्षेत्रमा श्रद्धालुको बाक्लो चहलपहल छ ।
पशुपतिनाथका साथै मुलुकका अन्य प्रमुख शिव मन्दिरहरूमा पनि आज भक्तजनको उल्लेखनीय उपस्थिति रहेको छ । देशभरका विभिन्न स्थानमा रहेका शिवालयहरूमा भक्तजनहरूले महादेवको पूजा–आराधना गर्दै जल अर्पण गरिरहेका छन् ।
साउनको सोमवारका अवसरमा विशेष गरी महिला श्रद्धालुहरू व्रत बस्ने र शिव मन्दिरमा पुगेर सुख, शान्ति तथा समृद्धिको कामना गर्ने परम्परा रहिआएको छ ।
मुलुकभरका शिवालयहरूमा भक्तजनको चापलाई मध्यनजर गर्दै सुरक्षा र दर्शनको व्यवस्थापनलाई सहज बनाइएको छ । पशुपतिनाथ क्षेत्रलगायतका स्थानमा भक्तजनको सहजताका लागि स्वयंसेवक तथा सुरक्षाकर्मीहरू परिचालन गरिएका छन् । –न्युज एजेन्सी नेपाल
