काठमाडौं, कात्तिक १७ । अस्ट्रेलियाका अनुभवी अलराउन्डर ग्लेन म्याक्सवेलले अन्तर्राष्ट्रिय क्रिकेटबाट सन्यास लिएका छन् । ३८ वर्षीय म्याक्सवेलले प्रथम श्रेणी र लिस्ट ए क्रिकेटबाट समेत बिदा लिएका छन् ।
यद्यपि, उनी बिग बास लिग (बीबीएल)मा मेलबर्न स्टार्सबाट खेल्नेछन् । क्लबले उनको सम्झौता २०२७–२८ सिजनसम्मका लागि नवीकरण गरेको छ ।
म्याक्सवेलले गत वर्ष जुनमै एकदिवसीय अन्तर्राष्ट्रिय (ओडीआई) क्रिकेटबाट सन्यास लिएका थिए । तर, टी–२० अन्तर्राष्ट्रिय क्रिकेटमा भने उपलब्ध थिए ।
उनले सन् २०२६ को टी–२० विश्वकप पनि खेलेका थिए । विश्वकपमा ओमानविरुद्ध गत फेब्रुअरीमा खेलेको खेल नै म्याक्सवेलको देशका लागि अन्तिम अन्तर्राष्ट्रिय खेल बन्यो ।
‘टी–२० विश्वकपअघि र पछि हामीबीच धेरै छलफल भएको थियो । अस्ट्रेलियाली टोली व्यवस्थापनबाट कुनै दबाब थिएन । हामीले भविष्यका लागि नयाँ खेलाडीलाई अवसर दिने निर्णय गर्यौँ । बंगलादेशमा पनि युवा खेलाडीले अवसर पाए र राम्रो प्रदर्शन गरे,’ म्याक्सवेलले फाइनल वर्ड पोडकास्टमा भने ।
