२५ बैशाख, काठमाडौं । वैशाख ३० गते हुने स्थानीय तह निर्वाचनलाई लक्षित गरेर दलहरुले चुनावी सभालाई तिब्रता दिएका छन् । सत्तारुढ गठबन्धन र नेकपा एमालेले आज आइतबार छुट्टाछुट्टै चार ठाउँमा सभा गर्दैछन् ।
गठबन्धनले कास्कीको पोखरा र दाङको तुलसीपुरमा आमसभा गर्दैछ । बिहान ११ बजे पोखरा र दिउँसो २ बजे तुलसीपुरमा कार्यक्रम हुने तालिका छ ।
सभालाई नेपाली काँग्रेसका सभापति एवं प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाल, काँग्रेसका वरिष्ठ नेता रामचन्द्र पौडेल लगायत नेताहरुले सम्बोधन गर्नेछन् ।
स्थानीय तह निर्वाचनलाई लक्षित गरेर नेकपा एमालेले पनि चितवन र बुटवलमा चुनावी सभा गर्दैछ । सभालाई नेकपा एमालेका अध्यक्ष केपी शर्मा ओलीले सम्बोधन गर्नेछन् । राजधानीमा पत्रकार सम्मेलन गरेपछि ओली हेलिकोप्टर मार्फत बुटबल जाने कार्यक्रम रहेको एमालेले जनाएको छ ।
चितवनमा नेकपा एमालेको तर्फबाट भरतपुर महानगरपालिकाको लागि विजय सुवेदीले प्रमुखमा उम्मेदवारी दिएका छन् ।
महानगरपालिकामा गठबन्धनको तर्फबाट नेकपा माओवादी केन्द्रकी रेणु दाहाल र स्वतन्त्र उम्मेदवारी दिएका नेपाली काँग्रेसका नेता जगन्नाथ पौडेलबीचको प्रतिस्पर्धालाई महत्त्वका साथ हेरिएको छ । त्यस्तै बुटवलमा हुने चुनावी सभालाई भने अध्यक्ष ओलीसँगै उपाध्यक्ष विष्णु पौडेल, सचिव छविलाल विश्वकर्मा लगायतका नेताले सम्बोधन गर्ने कार्यक्रम छ ।