२५ बैशाख, काठमाण्डौं । स्थानीय तहको चुनावको मिति नजिकिँदै जाँदा नेकपा एमालेका अध्यक्ष केपी शर्मा ओलीले सत्तारुढ नेपाली कांग्रेसको चर्को आलोचना गरेका छन । पत्रकार सम्मेलन गरी ओली कांग्रेसमाथि विभिन्न आरोप लगाउँदै खनिएका छन । एमाले अध्यक्ष ओलीले कांग्रेसमाथि देशमा सशस्त्र द्वन्द्व निम्त्याएको, निरंकुश राजतन्त्रसँ मिलेको, जनताको सत्ता राजालाई बुझाएको, छलकपट र षडयन्त्र गरी सत्ता चलाएको र लोकतन्त्रको उपहास गरेको आरोप लगाएका छन ।
एमाले अध्यक्ष ओलीले ६७ बुँदे अपील सार्वजनिक गर्दै कांग्रेसमाथि लगाएका आरोप यस्ता छन :
-देश–जनता–राजनीतिलाई चरम अन्धकारमा धकेल्न सशस्त्र द्वन्द्वलाई मार्ग प्रशस्त गर्यो ।
- कांग्रेस एमालेसँग कहिल्यै सहकार्य गर्न चाहँदैन, यस्तो सोच्नु पनि अपराध ठान्दछ । काँग्रेसले नै जनताको सत्ता राजालाई बुझाएको धेरै भएको छैन । अहिले पनि दक्षिणपन्थी, वामपन्थी अतिवाद र अवसरवादीहरूसँग घाँटी जोडेर गठबन्धन सरकार चलाएकै छ । ऊ जनादेशमा विश्वास गर्दैन । सकेसम्म मुद्दा मामिला, छलकपट, षड्यन्त्र र मिलावटबाटै सत्ताभोग गर्न चाहन्छ ।
-नेपाली कांग्रेसको सुविधामा आधारित परराष्ट्र नीतिले नेपाल र नेपालीको हित एवम् भावनामा कुठाराघात गर्दछ, नेपाल र नेपालीको हितभन्दा अन्य विषयहरूलाई प्राथमिकता दिन्छ ।
- कांग्रेसले राजनीतिक दलको आधारभूत मर्ममाथि प्रहार गर्यो । संसदीय मूल्य र मान्यतालाई नै कुल्चियो । संसद्ले सरकार निर्माण गर्ने संसदीय शासन प्रणालीको आदर्शको उपहास गर्यो ।
-संसद्लाई राजनीतिक निर्णयको थलो हुन नदिई बन्धक बनायो । स्वतन्त्र न्यायपालिकामाथि आघात पुर्यायो ।
-राजतन्त्रको अन्त्य र गणतन्त्रको उदयका लागि, संविधानसभाको निर्वाचन तथा संविधान लेखन र जारी गर्नका लागि तथा संघीय लोकतान्त्रिक गणतन्त्रात्मक संविधान कार्यान्वयन गर्नमा काँग्रेसको आन्तरिक घेराबन्दी व्यहोर्नुपर्यो ।
-निजामती सेवा नै खलबलिने गरी निजामती कर्मचारीलाई बर्खास्त गर्ने, राष्ट्र बैंकका गभर्नर निलम्बन गर्ने, प्रहरी संगठनमा प्रचलित ऐन नियमको दायरा उल्लङ्घन गर्दै नियुक्ति र बढुवा गरी सुरक्षा संगठनलाई तहसनहस पार्ने ।
-सरकारी उद्योगहरूलाई निजीकरणको बहानामा कौडीको मूल्यमा बेची राष्ट्रिय सम्पत्ति दोहन गर्ने ।
- कांग्रेस शासनकालमा आधुनिक भौतिक पूर्वाधार विकासका कुनै योजना न सुरु भए, न त सम्पन्न नै भए । शिक्षा र स्वास्थ्य क्षेत्रमा राज्यको भूमिकालाई अत्यन्त कमजोर बनाइयो, सामाजिक सुरक्षा र लोककल्याणप्रति निरन्तर उदासीनता देखाइयो ।
- कांग्रेस देशलाई गरिबी, विपन्नता, अभाव, लघुताभास र अनिश्चयको दुष्चक्रमा राखेर जनतामाथि शासन गर्न चाहन्छ ।
-राणा, राजा र कांग्रेसको सरकारले देशको विकास र जनताको सुख समृद्धिका लागि कुनै योजना अगाडि बढाएनन् । सरकार कहिल्यै आधुनिकता र उत्कृष्टतातर्फ केन्द्रित रहेन ।
-सरकारलाई तिर्नु\बुझाउनुपर्ने यकिन भइसकेको राजश्व मिलेमतोमा छूट माफी गरी देश र जनताको सम्पत्ति\राजश्व खाने, परिवारका सदस्य र नातेदारहरूको मिलेमतोमा योजना रचेर निर्धक्क भ्रष्टाचार गर्ने, प्रहरी प्रशासन र सम्पूर्ण राज्य संयन्त्रको दुरुपयोग गरी सत्ताभोग गर्नेलगायतका देश र जनताविरोधी कार्यहरू नेपाली कांग्रेसको सरकारले गरेको इतिहास छ ।
-नेपाली कांग्रेस फेरि एकपटक नेपाल र नेपालीको विकास, स्थिरता र स्थायित्वका लागि अवरोध बनेर उपस्थित भएको छ ।
साझा पोष्ट
