नेकपा एमालेका नेता तथा पूर्वमन्त्री रामवीर मानन्धरले कांग्रेस नेता प्रकाशमान र उनकी श्रीमती तथा काठमाडौं महानगरपालिकामा गठबन्धन दलहरुको तर्फबाट मेयरकी उम्मेदवार सिर्जना सिंहसँग गोप्य वार्ता गरेका छन् । रामवीरले शिनवार साँझ ठमेलको एउटा होटलमा गोप्य भेटवार्ता गरेका हुन् ।
सिंह दम्पत्तिसँग भलाकुसारी गर्न रामवीर साँझ पौने ७ बजे अमृत साइन्स क्याम्पस पछाडिको होटल अलफ्टमा पुगेका थिए। उनीहरु तीन जनाबीच स्थानीय तहको निर्वाचनबारे एक घण्टाभन्दा बढी समय गोप्य कुराकानी भएको हो ।
सिंह दम्पत्ति रामवीर पुग्नु अगावै होटलमा पुगेका थिए । रामवीर पौने ७ बजेदेखि ७ बजेको समयमा होटलभित्र छिरेका हुन् । भेटघाटपछि मानन्धर राति ८ बजेको हाराहारीमा निस्केको स्रोतको दाबी छ ।
एमालेको तर्फबाट मेयर उम्मेदवारमा केशव स्थापित र उपमेयरमा सुनिता डंगोल उठेका छन् । यसअघि मेयरको निम्ति एमाले जिल्ला कमिटीले वर्तमान मेयर विद्यासुन्दर शाक्यसहित स्थापित र रामवीरको नाम सिफारिस गरेको थियो । मेयरमा शाक्यपछि आफ्नो पल्ला भारी भएको अनुमान गरेका मानन्धरले स्थापितले टिकट प्राप्त गरेपछि ‘नसोचेको’ भयो भन्दै हिँडेका थिए ।
एमाले र तत्कालीन नेकपाभित्रको अन्तरविरोधको मौका छोपेर शहरी विकास राज्यमन्त्री बनेका मानन्धरको चाहना पछिल्लो समयमा काठमाडौंको मेयर हुने थियो । यसअघि उनी पटक पटक १६ नम्बर वडाको वडाध्यक्ष भएका थिए । अहिले उनी सो क्षेत्रका सांसद हुन् ।
बालाजु बाइपास घर भएका रामवीरलाई सो क्षेत्रमा सडक बिस्तार गर्ने नाममा आफ्नो घर जोगाएर स्थानीयको घर भत्काएको आरोप लाग्दै आएको छ । उनी अष्टनारायण फिल्म हलका मालिक पनि हुन् ।
–जनआस्थाबाट