२७ बैशाख, काठमाडौं । गौतमबुद्धको जन्मस्थलबारे बेलाबेला विवादाष्पद अभिव्यक्ति दिने भारतीय प्रधानमन्त्री प्रधानमन्त्री नरेन्द्र मोदी बुद्ध जयन्तीको अवसर पारेर लुम्बिनी आउने भएका छन् । पटकपटक नेपाल भ्रमण गरिसकेका मोदी पहिलो पटक लुम्बिनी आउन लागेका हुन् ।
उनी सन् २०१४ मा नेपाल भ्रमणमा आउँदासमेत लुम्बिनी भ्रमणमा जान चाहे पनि लुम्बिनी गएनन् । आगामी जेठ २ गते बुद्ध जयन्तीको अवसरमा मोदी लुम्बिनी आएर मायादेवी मन्दिरमा पूजाआजा गर्ने कार्यक्रम तय भएको छ । उनी भारतीय हेलिकप्टरबाट सिधै लुम्बिनी आउने र भ्रमण सकेर उतै फर्कने बताइएको छ ।
भ्रमणका क्रममा मोदीले एक ‘मोनास्ट्री’को शिलान्यास गर्ने कार्यक्रमसमेत रहेको स्थानीय प्रशासनले जनाएको छ । तर मोदीको भ्रमण कार्यक्रमबारे अझै जिल्ला प्रशासन कार्यालय र लुम्बिनी विकास कोषमा विस्तृत विवरण नआएको रुपन्देहीका सहायक प्रमुख जिल्ला अधिकारी कमलप्रसाद पाण्डेयले बताए । भ्रमणको तयारीलाई लिएर सुरक्षा लगायतका सबै व्यवस्थापन भने मिलाइसकिएको उनको भनाइ छ ।
बुद्ध जयन्तीका अवसरमा नेपालका प्रधानमन्त्री शेरबहादुर देउवा पनि सहभागी हुने र त्यही दुई पक्षीय भेटघाटदेखि नागरिक अभिनन्दन लगायतका कार्यक्रम रहेको छ ।