काठमाडौं । निलम्बित प्रधानन्यायाधीश चोलेन्द्र शम्शेर जबरालाई महाअभियोग सिफारिस समितिले लिएको बयानमा हस्ताक्षर गराउने तयारी भइरहेको छ । १७४ पेजको बयान पढेर जबरालाई सुनाउने काम भइरहेको छ । शुरुमा हस्ताक्षर गर्छु भनेका जबराले पछि अस्वीकार गरेको थिए । त्यसपछि सबै बयान पढेर सुनाउने काम भैरहेको छ । जबराले बयानका हरेक पानामा हस्ताक्षर गर्न लागेका छन् । शुरुमा सबै पढेर नसकिने भन्दै अन्तिमको एक पेजमा हस्ताक्षर गरिदिने बताएका जबराले हस्ताक्षर गर्न दिने बेला नमानेपछि अहिले अध्योपान्त पढेर सुनाउने काम भइरहेको समितिका सदस्य मीन विश्वकर्माले जानकारी दिए । कसैले उक्साएकाले जबराले हस्ताक्षर गर्न नमानेको हुन सक्ने अनुमान गरिएको छ । मीन विश्वकर्माले  भने ‘अक्षरश पढेर हस्ताक्षर गर्ने भनेपछि अहिले अधोपान्त पढाएर साइन गराउने तयारी भइरहेको छ । ’   पढ्दै जाँदा अहिलेसम्म जबराले 'ठिक छ' भनेका छन ।  बयान पढेर सुनाउन कम्तीमा पाँच घण्टा लाग्ने अनुमान छ । हस्ताक्षरपछि फेरि पुरक बयान हुनेछ ।