काठमाडौं । धनगढीमा पुगेर आफ्नो २०औँ सत्याग्रह थालेका डाक्टर गोविन्द केसीको स्वास्थ्य अवस्था जटिल बन्दै गएको छ । चिकित्सा शिक्षा सुधारका लागि विभिन्न माग सहित अनसन बसिरहेका केसीको ब्लड प्रेसर ९०/६० मा झरेको छ भने मुटुको चालपनि बढीरहेको उनका सहयोगी डाक्टर अमृत जैसीले जानकारी दिए । धनगढी पुगेर श्रीकृष्ण मन्दिरको धर्मशालाबाट २० औँ सत्याग्रह थालेका केसीको स्वास्थ्यमा समस्या देखिएपछि सेती प्रादेशिक अस्पताल भर्ना गरिएको छ । जैसीका अनुसार केसीलाई स्लाइन चढाइएको छ । डा. केसीले औषधि लिन नमानेकाले पनि उनको स्वास्थ्य अवस्था विग्रदै गएको जैसीले बताए । केसी धनगढी पुगेर अनशन बसेको पाँच दिन पुग्दा समेत सरकार पक्षबाट कुनै सुनवाइ भएको छैन ।