काठमाडौं । प्रत्यक्ष तर्फ १० सिट जितेपनि समानुपातिक तर्फ थ्रेस होल्ड कटाउन संघर्ष गरिरहेको नेकपा एकीकृत समाजवादीले २ लाख भोट नघाएको छ ।
मतगणनाको पछिल्ला विवरण अनुसार माधवकुमार नेपाल नेतृत्वको एकीकृत समाजवादीले २ लाख ७ हजार २ सय ७३ मत ल्याएको छ । राति १०ः ३० बजेसम्म ८० लाख ५० हजार ५१० मत गणना भैसकेको छ र समाजवादीले राष्टिय पार्टी बन्नका लागि अझै एक लाख मत ल्याउनुपर्ने हुन्छ । तर उसले त्यो मत ल्याउन सक्छ कि सक्दैन भन्ने यसै भन्न सकिने अवस्था छैन । अब २८ लाख भोट मात्रै गन्न बाँकी छ ।
नेकपा एमाले २२ लाख २३ हजार ८ सय ८१ मत सहित पहिलो स्थानमा छ । नेपाली कांग्रेसले २१ लाख २८ हजार ५७३, नेकपा माओवादी केन्द्रले ९ लाख ३३ ७३८ र राष्टिय स्वतन्त्र पार्टीले ९ लाख ९ सय ७६ भोट ल्याएको छ ।
यस्तै राप्रपाले ४ लाख ७७ हजार ३०२, जनता समाजवादी पार्टीले २ लाख ६० हजार ३९२, जनमत पार्टीले १ लाख ९६ हजार ४६, नागरिक उन्मुक्ति पार्टीले १ लाख ९० हजार १४३ र लोसपाले १ लाख ८ हजार ३३ मत पाएको छ ।