काठमाडौं। तोकिएको समयमा बैठक सुरु नगरेपछि उपप्रधान एवं परराष्ट्रमन्त्री नारायणकाजी श्रेष्ठ प्रतिनिधि सभा अन्तर्गतको अन्तर्राष्ट्रिय सम्बन्ध र पर्यटन समितिको बैठक छोडेर हिँडेका छन् । मङ्गलवार बिहान साढे १० बजेका लागि बोलाइएको समितिको बैठक पौने ११ बजेसम्म पनि सुरु नभएपछि मन्त्री बैठकबाट बाहिरिएका हुन् ।
मन्त्री श्रेष्ठ १० बजेर २८ मिनेटमा अर्थात् २ मिनेट अगाडि नै बैठक हलमापुगेका थिए, त्यतिबेला एक जना मात्रै सांसद सुनिता बराल उपस्थित थिईन् । । समिति सभापति राजकिशोर यादव मन्त्री बैठक कक्षमा आएको ८ मिनेटपछि हलमा प्रवेश गरे ।
मन्त्री श्रेष्ठले १०ः४५ बजेसम्म सांसदहरूको प्रतीक्षा गरे तर बैठक सञ्चालनका लागि १४ जना सांसद नपुगेपछि उनले आफ्नो 'अरू पनि काम भएकाले सांसदहरूलाई कुरेर बस्न नसक्ने' भन्दै बैठक छाडेर मन्त्रालयतिर लागे ।
मन्त्री श्रेष्ठसँगै मन्त्रालयका सचिव तथा कर्मचारीहरू पनि समितिबाट बाहिरिए । मन्त्री श्रेष्ठ निस्किएपछि नेमकिपा सांसद प्रेम सुवाल लगायतका केही सांसद आएपनि बैठक अनिश्चितकालका लागि स्थगित गरिएको छ । आजको बैठकमा मन्त्रीस्तरबाट पछिल्लो समयमा भएका वैदेशिक भ्रमणहरूको विवरण माग्ने, इजरायल, रुस र युक्रेनमा रहेका नेपालीहरूको विवरण र वर्तमान अवस्था, विदेश स्थित नेपाली नियोगहरूको विवरण, तिनको वर्तमान अवस्था, भोग्नुपरेको समस्या र सुधारका पक्षहरू बारे छलफल गर्ने कार्यसूची राखिएको थियो ।
